Pregunta
Kon Kristianismo ta mira suisidio? Kiko Beibel ta bisa tokante suisidio?
Kontesta
Beibel ta menshona sèis hende spesífiko ku a kometé suisidio: Abimelèk (Huesnan 9:54), Saul (1 Samuel 31:4), e kargadó di arma di Saul (1 Samuel 31:4-6), Ahitofèl (2 Samuel 17:23), Zimri (1 Reinan 16:18), i Hudas (Mateo 27:5). Sinku di nan tabata malbado, hòmbernan pekaminoso (no tin hopi informashon tokante e kargadó di arma di Saul pa nos por tin un bista di su personahe). Tin hende ta konsiderá Samson komo un ehèmpel di suisidio (Huesnan 16:26-31) ,pero e meta di Samson tabata pa mata e Filisteonan, i no su mes. Beibel ta mira suisidio mesun kos ku matamentu, kual ta loke e ta –matamentu di bo mes kurpa. Dios ta e úniko ku por disidi ki ora i kon un persona ta fayesé.
Segun Beibel, suisidio no ta algu ku ta determiná si un persona por drenta shelu òf no. Si un persona ku no ta salbá kometé suisidio, el a solamente “aselerá” su biahe pa bai fièrnu. Pero, e persona ei ku a kometé suisidio lo resultá den fièrnu pasobra el a rechasá salbashon pa medio di Kristu, i no pasobra el a kometé suisidio. Kiko Beibel ta bisa tokante un Kristian ku a kometé suisidio? Beibel ta siña nos ku for di e momentu ku nos a berdaderamente kere den Kristu, nos bida eterno ta garantisá (Huan 3:16). Segun Beibel, Kristiannan por sa sin ningun duda ku nan ta poseé bida eterno (1 Huan 5:13). Nada no por separá un Kristian di e amor di Dios (Romanonan 8:38-39). Si ningun “creatura” por separá un Kristian for di e amor di Dios, i asta un Kristian ku kometé suisidio ta un “kreatura”, e ora ei ni suisidio no por separá un Kristian for di Dios su amor. Hesus a muri pa tur nos pikánan, i si un berdadero Kristian, den un temporada di atakenan spiritual i debilidat, ta kometé suisidio, e piká aki tambe lo wòrdu kubrí pa medio di e sanger di Kristu.
Suisidio tòg ta un piká basta grave kontra Dios. Segun Beibel, suisidio ta asesinato; semper e ta robes. Un hende Kristian Ta trese dudanan grandi den e genuinidat di fe di un persona ku ta yama su mes Kristian ku tòg a kometé suisidio. No tin ningun sirkunsansia ku por hustifiká un hende, espesialmente un Kristian, pa kita su propio bida. Kristiannan a wòrdu yamá pa biba nan bida pa Dios, i ta Dios so por desidi ki ora un hende ta muri. Aunke e pasashi siguiente no ta papia tokante suisidio, 1 Korintionan 3:15 ta probablemente un bon deskripshon di lokual lo pasa ku un Kristian ku kometé suisidio: “… ma e mes lo keda salbá, pero na manera di bisa ku huma di kandela na su kurpa.”
English
Kon Kristianismo ta mira suisidio? Kiko Beibel ta bisa tokante suisidio?
