Pregunta
Dios ta eksistí? Tin prueba di Dios su eksistensia?
Kontesta
E eksistensia di Dios no por wòrdu probá ni nengá. Beibel ta bisa ku nos mester aseptá pa medio di fe ku Dios ta eksistí. Si un hende no ta kere den Dios, ta imposibel pa e hasi loke Dios ke. Pasobra es ku ke bai serka Dios, mester kere ku E ta eksistí i ku E ta rekompensá esnan ku ta busk’É” (Hebreonan 11:6). Si Dios tabata ke, lo E por a simplemente aparesé na tur hende i asina mustra henter mundu ku E ta eksistí. Pero si E hasi esei, nos lo no mester tin fe mas. “E ora ei Hesus a bis’é: “Pasobra bo a mira Mi, bo ta kere. Felis ta esnan ku ta kere, sin mira Mi”” (Huan 20:29).
Pero, esaki no ta nifiká ku no tin evidensia di Dios su eksistensia. Beibel ta bisa, “Shelu ta kanta Dios su mahestat, firmamentu ta konta di obra di su man. Kada dia ta anunsi’é na e dia siguiente, kada anochi ta splik’é na esun ku ta sigui. Sin papiamentu, sin uza ningun bos, sin zonido pa oreanan tende, nan yamada ta kore pasa tera henter, nan mensahe ta yega te den skinanan di mundu” (Salmonan 19:1-4). Mirando e streanan, komprondiendo e grandesa di universo, opservando e maravianan di naturalesa, mirando e bunitesa di un bahada di solo, tur e kosnan aki ta mustra ku tin un Kreador Dios. Si te na ora esakinan no ta sufisiente, den nos propio kurasonnan tin evidensia di Dios. Predikador 3:11 ta bisa nos, “… Dios a duna hende tambe un gana fuerte di sinta pensa riba tempu i riba loke ta pasa den e tempu ei.”. Profundamente den nos tin e rekonosementu ku di bèrdat tin algu mas aleu ku e bida aki i un ser mas ayá ku e mundu aki. Nos por nenga e konosementu aki intelektualmente, pero Dios Su presensia den nos i rònt di nos tòg ta keda opvio. Apesar di esaki, Beibel ta taha nos ku tin hende ku tòg ta nenga Dios Su eksistensia: “Hende bobo ta bisa den nan mes: “Ai nò, no tin Dios” (Salmonan 14:1). Komo ku gran mayoria di hende den historia, di tur kultura, di tur sivilisashon i riba tur kontinente ta kere den eksistensia di un tipo di Dios, mester tin algu òf (un hende) ku ta kousa e kreensia aki.
Añadiendo na e argumentonan bíbliko ku ta konserní e eksistensia di Dios, tin argumentonan lógiko tambe. Pa di promé, tin e argumento ontológiko. E tipo di argumento ontológiko di mas popular ta uza e konsepto di Dios pa proba ku Dios ta eksistí. E ta kuminsa ku e definishon di Dios komo “un ser ku no tin mas grandi kuné”. Ta wòrdu argumentá ku pa eksistí ta mas grandi ku no eksistí, i p’esei un ser di mas grandi mester eksistí. Si Dios no tabata eksistí, e ora ei Dios lo no tabata e ser di mas grandi, i esaki lo a kontradesí e definishon di Dios.
E segundo argumento ta e argumento teleológiko. E argumento teleológiko ta bisa ku komo universo tin un diseño asina grandioso, mester tabatin un Diseñadó dibino. Por ehèmpel, si Tera tabata signifikantemente mas serka òf mas leu for di solo, lo no tabata posibel pa tin mayoria di e bidanan ku tin aworaki na mundu. Si e elementonan den nos atmósfera tabata asta un par di porsentahe diferente, kasi tur kos ku tin bida riba e planeta aki lo a muri. E chèns pa ún molekül di proteina wòrdu formá ta 1 den 10243 (esei ta 10 ku 243 sero su tras). Ún sélula ta kontené miónes di molekül di proteina.
E terser argumento lógiko ku ta prueba eksistensia di Dios ta wòrdu yamá e argumento kosmológiko. Tur efekto mester tin un kousa. E universo aki i tur kos ku ta den dje ta un efekto. Mester tin algu ku a kousa tur kos pa bini den eksistensia. P’esei, mester tin algu “ku nunka no a wòrdu kousá” pa asina por kousa tur otro kos pa bini den eksistensia. E “kos ku nunka no a wòrdu kousá” ei ta Dios.
E di kuater argumento ta mihó konosí komo e argumento moral. Tur kultura den historia a yega di tin un forma di lei. Tur hende tin un persepshon di bon i malu. Matamentu, gañamentu, hortamentu i imoralidat ta wòrdu universalmente rechasá. Di unda e persepshon di bon i malu ta bini si no ta di un Dios santu?
Apesar di tur esaki, Beibel ta bisa nos ku hende lo rechasá e konosementu inekibokabel di e eksistensia di Dios i ku na lugá di esaki, nan lo kere den un mentira. Romanonan 1:25 ta deklará, “El a entregá nan, pasobra nan ata kambia e bèrdat tokante ken Dios ta pa un mentira; nan ta adorá i sirbi loke ta kreá na lugá di e Kreador ku meresé alabansa pa semper. Amen”. Beibel tambe ta proklamá ku hende ta sin èksküs pa keda sin kere den Dios: “For di tempu ku Dios a krea mundu, hende por komprondé klaramente kua ta e karakterístikanan invisibel di Dios, esta ku su poder no tin fin i ku en bèrdat E ta Dios. Hende por mira esaki den loke Dios a krea, p’esei nan no tin diskulpa” (Romanonan 1:20).
Hende ta pretendé di rechasá eksistensia di Dios pasobra e no ta “sientífiko” òf “pasobra no tin prueba.” E berdadero motibu di esaki ta pasobra asina ora nan admití ku tin un Dios, nan lo mester realisá tambe ku nan tinku karga responsabilidat ku Dios i ku nan mester di Su pordon (Romanonan 3:23, 6:23). Si Dios ta eksistí, e ora ei nos tinku duna kuenta na Dios pa nos aktonan. Si Dios no ta eksistí, e ora ei nos por hasi lokual nos kièr sin mester wòri ku Dios lo husga nos. Ta p’esei hopi di esnan ku ta nenga e eksistensia di Dios ta mara nan mes fuertemente na e teoria di evolushon naturalístiko – esaki ta duna nan un alternativo na lugá di kere den un Kreador, Dios. Dios ta eksistí i tur hende sa ku E ta ekistí. E solo echo ku tin hende ta purba agresivamente pa desprobá Su eksistensia ta de fakto un argumento pa Su eksistensia.
Kon nos por sa ku Dios ta eksistí? Komo Kristiannan, nos sa ku Dios ta eksistí pasobra nos ta papia kunÉ tur dia. Hopi biaha nos no ta skuch’É papia ku nos na un manera oudibel, pero nos por sinti Su presensia, su guiansa, nos konosé e amor ku E tin pa nos, nos ta deseá su grasia. Kosnan a yega di pasa den nos bida ku no por tin ningun otro splikashon ku no ta Dios. Dios milagrosamente a salba nos i a kambia nos bida i nos no por evitá di no rekonosé i alabá Su eksistensia. Niun dje argumentonan aki no por konvensé ningun hende ku ta nenga di rekonosé loke ta opvio kaba. Na final, e eksistensia di Dios lo mester wòrdu aseptá pa medio di fe (Hebreonan 11:6). Fe den Dios no ta un paso den skuridat; e ta un paso seif den un kamber yená ku lus, kaminda gran mayoria di hende tei pará kaba.
English
Dios ta eksistí? Tin prueba di Dios su eksistensia?
