Pregunta
Tin bida despues di morto?
Kontesta
E eksistensha di bida despues di morto ta un pregunta universal. Job a papia pa nos tur ora el a bisa, “Hende ku ta muhé a pari, ta hiba un bida kòrtiku yen di angustia i tristesa, e ta habri manera un flor, pa djis despues e marchitá; su bida ta kore pasa manera sombra pasahero.; Si hende por bolbe biba despues di morto...” (Job 14:1-2, 14). Manera Job, nos tur a yega di konfronta e pregunta aki. Kiko eksaktamente ta pasa ku nos despues ku nos muri? Nos lo simplemente stòp di eksistí? Bida ta mane un porta di despedida i regreso na mundu ku ta keda drai rònt pa despues logra grandesa personal? Tur hende lo bai na e mesun lugá, of nos ta resultá den diferente lugánan? Bèrdat tin un shelu i fiérnu?
Beibel ta bisa nos ku no ta solamente tin bida despues di morto, sino ku bida eterna ta asina glorioso ku “Loke niun hende no a yega di mira, ni niun hende no a yega di tende, ni niun hende no por imaginá nan, esei Dios a prepará pa esnan ku ta stim’É.” (1Korintionan 2:9). Hesu-Kristu, Dios den karni i wesu, a bin na mundu pa duna nos e regalo di bida eterna. “Pero nan a bor’é pa motibu di nos rebeldia, plèch’é pa motibu di nos piká; kastigu k’el a pasa a trese pas pa nos; danki na su yaganan nos a haña kura.” (Isaías 53:5). Hesus a tuma e kastigu ku nos tur ta meresé i a sakrifiká Su bida pa paga e kastigu di nos pikánan. Tres dia despues, El a demostrá di ta viktorioso riba morto dor di lanta bèk for di graf. El a keda kuarenta dia riba mundu i míles di hende a wak’É promé ku El a subi bai shelu. Romanonan 4:25 ta bisa, “Hesus a keda entregá na morto pa nos pikánan i a lant’É for di morto pa Dios por aseptá nos komo hustu.”
E resurekshon di Kristu ta un evento ku ta hopi bon dokumentá. E apòstel Pablo tabata enkurashá e hendenan pa kuestioná testígunan pa nan valides, i niun hende no por a bai kontra e bèrdat. E resurekshon ta e fundeshi di e fe Kristian. Pasobra Kristu a wòrdu lantá for di morto, nos por tin e fe ku nos tambe, lo wòrdu resusitá. E resurekshon di Hesu-Kristu ta e prueba di mas grandi ku tin bida despues di morto. Kristu tabata e promé di un grán kosecha ku lo wòrdu lanta for di morto atrobe. Morto físiko a bin pa medio di un hòmber, Adam, kual nos tur ta famia di dje. Pero tur hende ku a wòrdu adoptá den famia di Dios pa medio di fe den Kristu-Hesus lo haña bida nobo (1 Korintionan 15:20-22). Meskos ku Dios a lanta Hesus su kurpa, asina nos kurpa tambe lo wòrdu resusitá ora Hesus bini bèk (1 Korintionan 6:14).
Aunke nos tur lo wòrdu resusitá un dia, no ta tur hende lo bai shelu. Kada hende lo mester hasi un eskóho den nan bida, i e eskóho aki lo determiná e hende su destinashon eterna. Beibel ta bisa ku hende mester muri un bia, i despues di esei lo bin huisio (Hebreonan 9:27). Esnan ku a bira hustu pa medio di fe den Kristu lo haña bida eterna den shelu, pero esnan ku a rechasá Kristu komo nan Salbador lo haña kastigu eterno den fiérnu (Mateo 25:46). Fiernu, meskos ku shelu, no ta simplemente algu ku ta eksisti, pero e nan ta un luga di bèrdat. E ta un lugá kaminda hendenan inhustu lo ekperenshá kastigu eterno di Dios pa semper. Fiérnu ta wòrdu deskribí komo un pos sin fondo (abismo) (Lukas 8:31; Revelashon 9:1) i un laman di kandela, ku ta kima ku súlfura, kaminda e habitantenan lo wòrdu tormentá dia i anochi pa semper i semper (Revelashon 20:10). Den fiérnu, lo tin yoramentu i mordementu di djente, kual ta indiká tristesa i rabia intenso (Mateo 13:42).
Dios no ta haña plaser den morto di e mal hendenan, sino E ta deseá pa nan arepentí di nan aktonan maligno pa asina nan por biba (Ezekiel 33:11). Pero lo E no fòrsa ningun hende pa sirbi’É; si nos skohe pa rechas’É, E ta aseptá nos desishon pa biba separá for di djE pa semper. Bida riba mundu ta un tèst, un preparashon pa loke lo bini. Pa kreyentenan, bida despues di morto ta un bida eterna huntu ku Dios. Pa hendenan no-kreyente bida despues di morto ta eternidat den lago di kandela. Kon nos por risibí bida eterna despues di morto i evitá eternidat den lago di kandela? Ta un kaminda so tin- pa medio di fe i konfiansa den Kristu-Hesus. Hesus a bisa, “Ami ta e resurekshon i bida; esun ku kere den Mi, lo biba asta si e muri; i niun hende ku tin bida eterno, lo no muri nunka mas…” (Huan 11:25-26).
E regalo gratis di bida eterna ta disponíbel na tur hende. “Esun ku ta kere den e Yu, tin bida eterno; esun ku desobedesé e Yu, lo no tin bida eterno, pero ta keda sufri kastigu di Dios.” (Huan 3:36). Nos lo no haña e oportunidat di aseptá Dios su regalo di salbashon despues di morto. Nos destinashon eterna ta wòrdu determiná segùn nos bida riba mundu; si nos aseptá of rechasá Hesu-Kristu. “Tende, esaki ta e momentu apropiá; awe ta e dia di salbashon!” (2 Korintionan 6:2). Si nos konfia den e morto di Hesu-Kristu komo pago kompletu pa nos piká kontra Dios, nos ta garantisá no solamente un bida signifikante riba mundu, sino tambe bida eterna despues di morto, den e glorioso presensia di Kristu.
Bo a tuma e desishon di aseptá Kristu dor di algu ku bo a lesa akiriba? Si ta asina, porfabor klék riba e boton akibounan “Mi a aseptá Kristu awe”.
English
Tin bida despues di morto?
