Pregunta
Di bèrdat Beibel ta e Palabra di Dios?
Kontesta
Nos kontesta riba e pregunta aki no solamente lo determiná kon nos ta mira Beibel i su importansia den nos bida, pero tambe lo e tin un impakto eterno riba nos. Si realmente Beibel ta e Palabra di Dios, e ora ei nos mester apresi’é, studi’é, obedes’é i tambe konfi’é kompletamente. Si Beibel ta e Palabra di Dios anto nos rechas’é, e ora ei ta meskos ku nos a rechasá Dios mes.
E echo ku Dios a duna nos Beibel ta evidensia i ilustrashon di Su amor pa ku nos. E termino “revelashon” simplemente ta nifiká ku Dios a komuniká ku ser humano tokante kon E ta i kon nos por tin un bon relashon kun’E. Nos lo no por tabata sa e kosnan aki sin ku Dios mes a revelá nan na un manera dibino na nos, pa medio di Beibel. Maske ku Dios ta revelá Su mes gradualmente den Beibel durante aproksimadamente 1500 aña, semper Beibel tabata kontené tur informashon ku hende mester sa di Dios pa asina nan por tin un bon relashon kun’E. Si Beibel berdaderamente ta e Palabra di Dios, e ora ei e tin outoridat total riba tur asuntu ku tin di haber ku fe, praktikánan religioso i moral.
Loke nos mester puntra nos mes ta, kon nos por ta sigur ku Beibel ta e Palabra di Dios anto no djis un otro bon buki? Kiko ta hasi Beibel asina úniko, kompará ku otro bukinan religioso? Tin algun prueba ku Beibel ta realmente e Palabra di Dios? E tipo di preguntanan aki mester wòrdu eksaminá seriamente si nos ke determiná si realmente Beibel ta e berdadero Palabra di Dios, dibinamente inspirá i totalmente sufisiente pa tur afèr, fe i praktiká. No tin ningun duda ku Beibel ta afirmá di ta e berdadero Palabra di Dios. Esaki ta klaramente pará den un karta ku Pablo a skirbí pa Timoteo:”… Ademas kòrda tambe ku abo konosé Skritura Sagrado fo'i chikí; Skritura por instruí bo i duna bo e sabiduria ku ta hiba na salbashon pa medio di fe den Kristu-Hesus. Henter Skritura ta inspirá pa Dios i ta útil pa duna siñansa, refutá, koregí i pa instruí kon biba un bida rekto, di manera ku e hende ku ta sirbi Dios, por ta kualifiká i bon prepará pa hasi tur sorto di bon obra.” (2 Timoteo 3:15-17).
Tin evidensia tantu interno komo eksterno ku Beibel ta realmente e Palabra di Dios. Evidensia interno ta kosnan den Beibel ku ta testifiká tokante su origen dibino. Un di e evidensianan interno ku Beibel ta realmente e Palabra di Dios, ta den e manera ku e bukinan ta uní. Maske ku den realidat Beibel ta konsistí di sesentiseis buki individual, kual a wòrdu skirbí na tres diferente kontinente, den tres diferente idioma, durante un periodo di aproksimadamente 1500 aña, dor di mas ku 40 outor, kual a bini for di diferente areanan di bida, tòg Beibel ta ketubai un buki totalmente uní di kuminsamentu te final sin ningun kontradikshon. E unidat aki ta hopi úniko kompará ku tur otro bukinan anto esaki ta prueba di e origen dibino di e palabranan ku Dios a inspirá hende pa skirbi.
Un otro evidensia interno ku ta indiká ku Beibel ta e berdadero Palabra di Dios ta e profesíanan kontení den e pàginanan. Den Beibel tin mas ku shen profesia detayá ku ta konserní e futuro di kada nashon individual, inkluyendo Israel, sierto suidatnan i ser humano. Otro profesiánan ta konserní e benida di Esun ku lo ta e Mesias, e Salbador di tur hende ku ta kere den djE. Kontrali di e profesíanan ku por wordu haña den otro bukinan religioso or ku a wòrdu skirbí dor di hendenan manera Nostradamus, profesíanan bíbliko ta ekstremadamente detayá. Tin mas ku treshen profesía ku ta papia tokante Hesu-Kristu den Tèstamènt Bieu. No solamente nan a profetisá unda lo E nasé i su desendensia, pero tambe kon lo E muri i ku lo E bolbe lanta for di morto. Simplemente no tin ningun otro manera lógiko pa splika e profesíanan ku a wòrdu kumplí den Beibel, ku no ta pa medio di su orígen dibino. No tin ningun otro buki religioso ku e kaliber òf tipo di profesíanan prediktivo ku Beibel ta kontené.
E di tres evidensia interno di e origen dibino di Beibel ta e outoridat i poder úniko di dje. Mientras e evidensia aki ta mas subhetibo ku e dosnan mas prome, e no ta nada menos ku un testimonio poderoso di e orígen dibino di Beibel. E outoridat di Beibel ta sin igual na kualkier otro buki ku a yega di wòrdu skirbí. E outoridat i poder aki ta evidente den e manera kon multitutnan di bida ta wòrdu transformá pa medio di e poder supernatural di e Palabra di Dios. Drogadíktonan a wòrdu kurá dor di dje, homoseksualnan a wòrdu liberá dor di dje, vagabundonan i parasitonan a wòrdu transformá dor di dje, kriminalnan sin eskrupulo a wòrdu reformá dor di dje, pekadornan a wòrdu refutá dor di dje anto odio a wòrdu kombertí den amor dor di dje. Beibel ta poseé un poder dinámiko i di transformashon ku ta solamente posibel pasobra e ta berdaderamente e Palabra di Dios.
Tin evidensianan eksterno tambe ku ta indiká ku Beibel ta berdaderamente e Palabra di Dios. Un di e pruebanan ta e aspektonan históriko di Beibel. Dor ku Beibel ta kontené detayenan di eventonan históriko, por verifiká su balides manera kualkier otro dokumento históriko. Pa medio di evidensianan arkeológiko i tambe otro skrituranan, e balides di e kuentanan históriko den Beibel a wòrdu probá tur bes. De fakto, tur e evidensianan arkeológiko i manuskritonan ta sostené Beibel, kual ta hasié e buki di mas miho dokumentá di mundu antiguo. E echo ku Beibel a registrá eventonan ku a wòrdu histórikamente verifiká, ta un bon indikashon di balides ora ta trata di topikonan i doktrinanan religioso i e ta yuda sostené e afirmashon ku e ta e berdadero Palabra di Dios.
Un otro evidensia eksterno ku Beibel ta e berdadero Palabra di Dios, ta e integridat di e outornan humano. Manera a wòrdu menshoná den anterior, Dios a uza hendenan ku ta bin di diferente areanan di bida pa dokumentá Su palabranan. Ora nos studia e bida di e personanan aki, nos por mira ku nan ta hendenan honesto i sinsero. E echo ku nan tabata dispuesto pa muri mortonan basta kruel djis pa motibu di nan kreensia, ta testifiká ku e personanan ordinario i honesto aki, di bèrdat tabata kere ku Dios a papia ku nan. E personanan ku a skirbi Tèstamènt Nobo i miles di otro kreyentenan (1 Korintionan 15:6) tabata rekonosé e bèrdat den nan mensahe, pasobra nan a mira i pasa tempu huntu ku Hesu-Kristu despues ku El a lanta for di morto. Nan a mira Hesu-Kristu despues ku El a resusitá i esaki tabatin un tremendo impakto riba nan. Kaminda antes nan tabata skonde yen di miedu, awor nan tabata dispuesto pa muri pa e mensahe ku Dios a revelá na nan. Nan bida i mortonan ta testifiká na e echo ku Beibel berdaderamente ta e Palabra di Dios.
E delaster evidensia eksterno ku Beibel ta e berdadero Palabra di Dios ta ku Beibel ta indestruktibel. Dor di e importansia i afirmashon ku Beibel ta e berdadero Palabra di Dios, Beibel a pasa den hopi mas atakenan severo i atemptonan pa distruí’e ku kualke otro buki den historia. For di e Emperadonan Romano manera Diocletian te ku e diktadónan komunista i awendia tambe ateonan i agnostikonan, Beibel a vense tur su enemigunan i te ku awe e ta e buki di mas publiká na mundu.
Tur tempu sképtikonan a konsiderá Beibel komo algu mitiko, pero arkeológia a konfirmá ku e ta históriko. Oponentenan a ataká e señansanan komo primitivo i antikuá, pero e konseptonan moral i legal tin influensha positivo riba sosiedatnan i kulturanan rònt mundu. Ainda e ta wòrdu ataká dor di siensia falsu, sikología, i movementunan polítiko, pero tòg te ainda e ta keda mesun balido i relevante awe ku e tabata ta tempu el a wòrdu skirbi pa promé biaha. E ta un buki ku a transformá kantidat inumerabel di bidanan i kulturanan durante e delaster 2000 añanan aki. Maske kon su oponentenan purba ataká, destruí òf diskredita Beibel, e ta keda permanese tòg; no por nenga su balides i e impakto ku e tin riba bidanan. E perfekshon kual a wòrdu preservá apesar di tur e atemptonan pa korumpí, ataká òf distruí Beibel, ta un bon testimonio na e echo ku Beibel berdaderamente ta e Palabra di Dios i ku e ta wòrdu protehá supernaturalmente dor di Dios. Nos no mester keda sorprendí ku maske kuantu Beibel wòrdu ataká, ku semper e ta keda sin ningun kambio i kompletu. Dimes, Hesus a bisa, “Shelu i tera lo pasa bai, ma mi palabranan sí lo no pasa bai” (Marko 13:31). Despues di a eksaminá e evidensianan aki, un hende sin ningun duda por bisa ku si, Beibel di bèrdat ta e Palabra di Dios.
English
Di bèrdat Beibel ta e Palabra di Dios?
