Pregunta
Kiko Beibel ta bisa tokante tatuahe/ piercing na kurpa?
Kontesta
Lei di Tèstamènt Bieu a ordená e Israelitanan, “…ni marka ni tatuá boso kurpa komo señal di rou. Ami ta SEÑOR” (Levítiko 19:28). Dus, maske kreyentenan awendia no ta bou di lei di Tèstamènt Bieu (Romanonan 10:4; Galatanan 3:23-25; Efesionan 2:15), e echo ku tabatin un mandamentu ku ta kontra tatuahe mester hala nos atenshon. Tèstamènt Nobo no ta bisa nada tokante si un kreyente por buta un tatuahe òf no.
Nos tin e mandamentu aki den 1 Pedro 3:3-4 si: “No usa kos eksterno pa hasi boso aparensia bunita, manera pèinadonan ekstrabagante, bistimentu di kos di oro i paña luhoso. Pero boso bunitesa mester sali for di loke boso tin den boso kurason, e bunitesa duradero di un spiritu suave i trankil. Ta e bunitesa ei ta esun di mas balioso den bista di Dios.” Ta bèrdat ku e pasashi aki a wòrdu dirigí na muhénan Kristian, pero tin un prinsipio aki den ku por ta adaptabel tambe: esta, ku e persona su aparensia eksterno no mester ta e enfoke di nos atenshon. Hopi esfuerso ta bai na “pèinadonan di kabei ekstrabagante” i “pañanan fini” i hoyanan, pero no ta den e kosnan aki e berdadero bunitesa di un hende muhe ta sinta. N’e mesun manera, tatuahe i piercing na kurpa ta “adornonan eksterno” i nos mester paga tinu pa nos inka mas esfuerso den e desaroyo di nos ´ser interno´, no ta importa si nos ta muhé òf hòmber.
Ora ta trata di tatuahe i piercing na kurpa, un bon test ta pa determiná si nos por honestamente i ku konsenshi limpi, pidi Dios bendishoná i uza e aktividat en partikular ei pa Su propio metanan perfekto. “En todo kaso, sea ku boso ta kome òf bebe, hasi tur kos na honor di Dios” (1 Korintionan 10:31). Tèstamènt Nobo no ta kontra tatuahe of piercing na kurpa spesífikamente, pero tampoko e no ta duna nos ningun motibu pa pensa ku Dios ke pa nos buta tatuahe òf piercing na kurpa.
Un prinsipio skritural importante ku nos por uza ora Beibel no ta menshona un asuntu spesífiko ta, ku si tin algun duda ku e kos ta agradá Dios, e ora ei ta miho pa no partisipá den e aktividat ei. Romanonan 14:23 ta rekordá nos ku tur loke ku no ta bini di fe ta piká. Nos mester korda ku nos kurpa, mesun kos ku nos alma, a wòrdu salbá i ta pertenesé na Dios. Aunke 1 Korintionan 6:19-20 no ta dirigí direktamente na tatuahe òf piercing na kurpa, tòg e ta duna nos un prinsipio: ´Boso no sa ku boso kurpa ta tèmpel di Spiritu Santu? Dios a duna boso Spiritu Santu i Spiritu Santu ta biba den boso. Boso no ta di boso mes: Dios a kumpra boso i a paga e preis! Usa boso kurpa anto pa glorifiká Dios”. E bèrdat grandi aki mester influensha nos desishonnan tokante kiko nos ta hasi i unda nos ta bai ku nos kurpa. Si nos kurpa ta pertenesé na Dios, nos mester ta sigur ku nos tin Su “permit’’ promé ku nos ’marka nan´ ku tatuahe i piersingnan na kurpa.
English
Kiko Beibel ta bisa tokante tatuahe/ piercing na kurpa?
