Pregunta
Dios a krea maldat?
Kontesta
Na promé bista por aparentá ku si Dios a krea tur kos, e ora ei esaki ke men ku El a krea maldat tambe. Pero, maldat no ta un “kos” manera un piedra òf elektrisidat. Bo no por tin un bòter di maldat. Maldat no ta eksistí riba su mes; es mas, e ta ousensia di bon. Por ehèmpel, burakunan ta eksistí pero nan ta eksistí solamente den algu otro. Nos ta yama e ousensia di tera un buraku, pero e no por wòrdu separá f’oi dje tera. Meskos ora Dios a krea, ta bèrdat ku tur loke El a krea tabata bon. Un dje kosnan bon ku Dios a traha ta kreaturanan ku tabatin e libertat di skohe pa bon. Pa por tabatin un eskoho real, Dios mester a pèrmití algu otro eksistí ku no ta bon pa un eskoho por wòrdu hasí. Asina, Dios a pèrmití e angelnan i ser humanonan di ta liber pa skohe bon òf rechasa bon (maldat). Ora ta eksistí un mal relashon entre dos kos bon nos ta yama esaki maldat, pero e no ta bira un “kos” ku Dios mester a krea.
Kisas un ilustrashon mas por yuda. Si un persona haña e pregunta, “Friu ta eksistí?” e kontesta mayoria bia lo ta “si”. Pero, esaki ta inkorekto. Friu no ta eksistí. Friu ta ousensia di kayente. Meskos, skuridat no ta eksistí; e ta e ousensia di lus. Maldat ta e ousensia di bon, òf mas miho bisá, maldat ta e ousensia di Dios. Dios no mester a krea maldat, sino mas bien solamente El a pèrmití ousensia di bon.
Dios no a krea maldat, pero E ta pèrmití maldat si. Si Dios no a pèrmití e posiblidat di maldat, tantu ser humano komo e angelnan lo tabata sirbi Dios bou di obligashon, i no di nan propio eskoho. E no tabata ke “robòtnan” ku simplemente ta hasi loke E ke pa nan hasi paso nan ta “programá”. Dios a pèrmití e posiblidat di maldat pa asina nos por berdaderamente tin un propio boluntat i por skohe si nos ke sirbi’É si òf no.
Komo ser humano finito, nos no por komprondé un Dios infinito kompletamente (Romanonan 11:33-34). Tin bia nos ta pensa ku nos ta komprondé dikon Dios ta hasi algu, loga despues nos ta haña sa ku e kos a pasa pa un otro motibu ku nos a pensa for di den prinsipio. Dios ta wak e kosnan for di un perspektiva santu i eterno. Nos ta mira e kosnan for di un perspektiva pekaminoso, mundano i temporal. Dikon Dios a pone hòmber riba tera sabiendo ku Adam i Eva lo peka i dor di esaki trese maldat, morto i sufrimentu den henter humanidat? Dikon E no a djis krea nos tur i laga nos den shelu kaminda nos por ta perfekto i sin sufrimentu? E preguntanan aki no por wòrdu kontestá adekuadamente na e banda aki di eternidat. Loke si nos por sa ta, ku no ta importa kiko Dios hasi paso lo e ta santu i perfekto i na final e kos lo glorifik’É. Dios ta pèrmití e posiblidat di maldat pa asina nos por haña un berdadero eskoho pa nos ador’É. Dios no a krea maldat, pero E ta pèrmiti’é. Si E no tabata pèrmiti’é, nos lo ta adorand’É dor di obligashon, i no paso nos mes a skohe esei.
English
Dios a krea maldat?
