Pregunta
Kiko ta nifiká ku Hesus ta e Yu di Dios?
Kontesta
Hesus no ta Yu di Dios den e sentido di un tata humano i un yu. Dios no a kasa i haña un yu hòmber. Dios no a tene relashon ku Maria i, huntu kuné, produsí un yu hòmber. Hesus ta Yu di Dios den e sentido ku E ta Dios manifestá den forma humano (Huan 1:1, 14). Hesus ta Yu di Dios den e sentido ku E a wòrdu konsebí den Maria pa medio di Spiritu Santu. Lukas 1:35 ta deklará, “Spiritu Santu lo baha riba bo i poder di Altísimo lo tapa bo manera un sombra. P'esei e yu ku lo bo trese na mundu lo ta santu i nan lo yam'é “Yu di Dios.””
Durante Su huisio dilanti e lidernan hudiu, e Gransaserdote a eksigí Hesus, “ ‘Den nòmber di Dios bibu, mi ta pone bo bou di huramentu: Bisa nos: ta abo ta Mesias, e Yu di Dios?” (Mateo 26:63). “Hesus a kontest'é: ‘Manera bo di! For di awe, boso lo mira e Yu di hende sintá na man drechi di Dios Poderoso i biniendo riba e nubianan na shelu.’” (Mateo 26:64). E lidernan hudiu a reakshoná dor di akusá Hesus di blasfemia (Mateo 26:65-66). Mas despues, dilanti Ponsio Pilato, “E hendenan a kontestá: ‘Nos tin un lei i segun e lei ei e mester muri, pasobra el a pretendé di ta Yu di Dios!’” (Huan 19:7). Dikon Su afirmashon di ta e Yu di Dios a wòrdu konsiderá blasfemoso i meresidamente di un sentensia di morto? E lidernan hudiu a komprondé eksaktamente loke Hesus tabata ke men ku e frase “Yu di Dios.” Ser Yu di Dios ta meskos ku tin e mesun naturalesa ku Dios. E Yu di Dios ta “ di Dios”. E afirmashon di ta bin di e mesun naturalesa di Dios – pa de fakto ser Dios –tabata blasfemoso pa e lidernan hudiu; p’esei, nan a exigí e morto di Hesus, pa kumplí ku Levítiko 24:15. Hebreonan 1:3 ta ekspresá esaki klaramente, “Den djE gloria di Dios ta resplandesé, E ta semehansa di Dios su ser.”
Un otro ehèmpel por wòrdu hañá den Huan 17:12 kaminda Hudas a wòrdu deskribí komo e “yu di pèrdishon.” Huan 6:71 ta bisa nos ku Hudas tabata e yu hòmber di Simon. Kiko Huan 17:12 ta nifiká ora e ta deskribí Hudas komo e “yu di pèrdishon”? E palabra pèrdishon ta nifiká “destrukshon, ruina, desperdisio”. Hudas no tabata literalmente e yu di “ruina, destrukshon i desperdisio”, pero e kosnan ei tabata e identidat di e bida di Hudas. Hudas tabata e manifestashon di pèrdishon. Na e mesun manera, Hesus ta e Yu di Dios. E Yu di Dios ta Dios. Hesus ta manifestashon di Dios (Huan 1:1, 14).
English
Kiko ta nifiká ku Hesus ta e Yu di Dios?
