Pregunta
Hesus a bai fièrnu durante e tempu entre Su morto i resurekshon?
Kontesta
Tin masha tantu konfushon ora ta trata di e pregunta aki. E konsepto ku Hesus a bai fièrnu despues di Su morto riba krus ta bini primeramente di e Kredu di Apòstelnan, kual ta bisa, “ku a baha na fièrnu”. Tambe tin algun Skritura ku, dependé kon nan a wòrdu tradusí, ta deskribí ku Hesus a bai “fièrnu”. Ora studia e kos aki, ta importante pa komprondé na promé luga lokual Beibel ta siña nos tokante e reino di morto.
Den Skrituranan hebreo, e palabra ku ta wòrdu uzá pa deskribí e reino di morto ta sheol. E ta simplemente nifiká “e luga di morto” òf “e luga kaminda e alma/spiritunan ta bai”. E término griego di Tèstamènt Nobo pa sheol ta hades, kual tambe ta referí na “e luga di e mortonan”. Otro Skrituranan den Tèstamènt Nobo ta indiká ku sheol/hades ta un luga temporal, kaminda e almanan ta keda miéntras nan ta warda riba e resurekshon i huisio final. Revelashon 20:11-15 ta duna un distinkshon klaramente entre hades ku e laman di kandela. E laman di kandela ta e luga permanente i final pa huisio di esnan pèrdí. Hades, e ora ei, ta un luga temporal. Hopi hende ta referí tantu hades komo e laman di kandela komo “fièrnu”, anto esaki ta kousa konfushon. Hesus no a bai na un luga di tormenta despues di Su morto, sino El a bai hades.
Sheol/hades tabata un reino ku dos divishon – un luga di bendishon i un luga di huisio (Mateo 11:23; 16:18; Lukas 10:15; 16:23; Echonan 2:27-31). Por lo general, e luga kaminda esnan salbá i esnan pèrdí ta keda ta wòrdu yamá “hades” den Beibel. E luga kaminda esnan salbá ta keda ta wòrdu yamá “banda di Abraham” den Lukas 16:22 i “paraiso” den Lukas 23:43. E luga kaminda esnan salbá i esnan pèrdí ta keda tabata wòrdu separá dor di un “klof hundu”(Lukas 16:26). Ora Hesus a muri, El a bai na e banda bendishoná di sheol i, di einan, El a bai shelu ku e kreyentenan (Efesionan 4:8-10). E parti di huisio di sheol/hades a keda meskos. Tur hende morto ku no ta kreyente ta bai einan pa warda riba nan huisio final, kual lo tuma luga den futuro. Hesus a bai sheol/hades? Si, segun Efesionan 4:8-10 i Pedro 3:18-20.
Algun di e konfushonnan ta bini dor di pasashinan manera Salmonan 16:10-11, dor di e manera ku nan a wòrdu tradusí den e Beibel ingles, vershon di King James: “For thou wilt not leave my soul in hell; neither wilt thou suffer thine Holy One to see corruption. . . . Thou wilt show me the path of life.” E palabra “hell” kual ta nifiká “fièrnu” na Papiamentu, no ta e tradukshon korekto den e versíkulo aki. E tradukshon korekto ta “e graf” òf “sheol”. Hesus a bisa e malechor bandi djE, “Awe mes lo bo ta huntu ku Mi den paraiso” (Lukas 23:43); E no a bisa, “Lo Mi mirabu den fièrnu”. E kurpa di Hesus tabata den e graf; Su alma/spiritu a bai serka esnan bendishoná den sheol/hades. Lamentablemente, den hopi vershon di Beibel, e intérpretenan no ta konsistente ni korekto den e manera ku nan ta tradusí e palabranan hebreo i griego pa “sheol”, “hades”, i “fièrnu”.
Tin hende tin e punto di bista ku Hesus a bai “fièrnu” òf e parti di sufrimentu na sheol/hades pa asina E sigui wòrdu kastigá pa nos pikánan. E idea aki no ta niun tiki bíbliko. Ta e morto di Hesus riba krus a proveé sufisiente pa nos salbashon. Ta Su sanger deramá a kousa nos propio purifikashon di piká (1 Huan 1:7-9). Miéntras El a kologá riba e krus, El a tuma e karga di piká di henter rasa humano riba Su mes. El a bira piká pa nos: “Kristu tabata sin piká, pero Dios a pone nos pikánan riba djE pa asina Dios por aseptá nos komo hustu” (2 Korintionan 5:21). E imponementu di piká aki ta yuda nos komprondé e lucha di Kristu den e hòfi di Getsémani ku e kopa di piká, kual lo mester a wòrdu deramá riba djE ora E tabata riba krus.
Miéntras Hesus tabata muriendo, El a bisa, “Ta kumplí” (Huan 19:30). Su sufrimentu na nos luga a wòrdu kompletá. Su alma/spiritu a bai hades (e luga di morto). Hesus no a bai “fièrnu” òf e banda di sufrimentu di hades; El a bai “banda di Abraham” òf e parti bendishoná di hades. E sufrimentu di Hesus a kaba na momentu di Su morto. E pago di piká a wòrdu kompletá. Despues El a bai warda riba e resurekshon di Su kurpa i Su regreso na gloria ora di su asenshon. Hesus a bai fièrnu? No. Hesus a bai sheol/hades? Si.
English
Hesus a bai fièrnu durante e tempu entre Su morto i resurekshon?
