Pregunta
Kiko ta e kaminda Romano pa salbashon?
Kontesta
E kaminda Romano pa salbashon ta un manera pa splika e bon notisia di salbashon uzando versíkulonan for di e Buki di Romanonan. E un metodo simpel, pero tòg poderoso ku ta splika dikon nos mester di salbashon, dikon Dios a provee salbashon, kon nos por risibí salbashon, i kiko ta e resultadonan di salbashon.
E promé versíkulo di e Kaminda Romano pa salbashon ta Romanonan 3:23, “Tur hende a peka i ta karesé di Dios su gloria.” Nos tur a peka. Nos tur a yega di hasi kosnan ku ta desagradabel na Dios. No tin niun ku ta inosente. Romanonan 3:10-18 ta duna nos un imágen detayádamente kon piká den nos bida ta. E di dos Skritura tokante e Kaminda Romano pa salbashon, ta Romanonan 6:23, kual ta splika nos tokante e konsekuenshanan di piká – “Pasobra e pago di piká ta morto, pero e regalo ku Dios ta duna ta bida eterna, ku nos por haña den nos Señor Kristu-Hesus.” E kastigu ku nos ta meresé pa nos pikánan ta morto. No morto físiko so, sino morto eterno!
E di tres versíkulo tokante e Kaminda Romano pa salbashon ta sigui kaminda Romanonan 6:23 a keda, “pero e regalo ku Dios ta duna ta bida eterna, ku nos por haña den nos Señor Kristu-Hesus.” Romanonan 5:8 ta deklará, “Dios sí a demostrá su amor pa nos dor ku Kristu a muri pa nos miéntras nos tabata pekador ainda.”. Hesu-Kristu a muri pa nos! Hesus Su morto ta e pago di nos pikánan. Hesus Su resurekshon ta prueba ku Dios a aseptá Hesus su morto komo pago pa nos pikánan.
E di kuater parti di e Kaminda Romano pa salbashon ta Romanonan 10:9, “Pasobra si ku bo boka bo proklamá ku Kristu ta Señor i den bo kurason bo kere ku Dios a lant’É for di morto, lo bo ta salbá! Dor ku Hesus a muri na nos luga, úniko kos ku nos mester hasi ta kere den djE, i konfia ku Su morto ta e pago pa nos pikánan- i nos lo ta salbá! Romanonan 10:13 ta bisa: “Tur ku invoká nòmber di Señor lo ta salbá”. Hesus a muri pa paga e kastigu di nos pikánan i asina salba nos di morto eterno. Salbashon, pordon di piká, ta disponíbel na tur ku ke konfia den Hesu-Kristu komo nan Señor i Salbador.
E delaster aspékto di e Kaminda Romano pa salbashon ta e resultado nan di salbashon. Romanonan 5:1 tin e maravioso mensahe, “Awor ku Dios a aseptá nos komo hustu pa medio di fe, nos tin pas ku Dios, pa medio di nos Señor Hesu-Kristu. Pa medio di Hesu-Kristu nos por tin un relashon di pas ku Dios. Romanonan 8:1 ta siña nos, “Ke men anto, awor aki no tin kondenashon pa esnan ku ta uní ku Kristu-Hesus.” Dor ku Hesus a muri na nos luga, nos lo no wòrdu kondena nunka pa nos pikánan. Finalmente, nos tin e promesa presioso di Dios kual ta para den Romanonan 8:38-39, “Pasobra Mi tin sigur ku ni morto ni bida, ni angel ni outoridat, ni kosnan presente ni kosnan futuro, ni forsanan spiritual, ni e lugá di mas haltu ni esun di mas profundo, ni niun otro kos ku Dios a krea, no por separá nos nunka di e amor ku Dios a mustra nos den persona di Kristu-Hesus nos Señor.”
Bo ke sigui e Kaminda Romano pa salbashon? Si ta asina, ata un simpel orashon ku bo por resa na Dios. Resando e orashon aki ta un manera pa deklará na Dios ku bo ta depende di Hesu-Kristu pa bo salbashon. E palabranan mes lo no salbabu. Solamente fe den Hesu-Kristu por dunabu salbashon! “Señor, mi sa ku mi a peka kontra Bo i ku mi ta meresé kastigu. Pero Hesu-Kristu a tuma e kastigu ku ami ta meresé pa asina pa medio di fe den djE mi por haña pordon. Ku Bo yudansa, mi ta pone mi konfiansa den Bo pa salbashon. Danki pa Bo maravioso grasia i pordon- e regalo di bida eterna! Amen!”
Bo a tuma e desishon di aseptá Kristu dor di algu ku bo a lesa akiriba? Si ta asina, porfabor klék riba e boton akibounan “Mi a aseptá Kristu awe”.
English
Kiko ta e kaminda Romano pa salbashon?
