Pregunta
Kiko ta nifiká ser un Kristian nasé di nobo?
Kontesta
Kiko ta nifiká ser un Kristian nasé di nobo? E klásiko pasashi di Beibel ku ta kontestá e pregunta aki ta Huan 3:1-21. Señor Hesu-Kristu tabata papia ku Nikodemo, kual tabata un fariseo i miembro importante di Sanhedrin (un lider di e pueblo hudiu). Nikodemo a bai serka Hesus e anochi ei paso e tabatin preguntanan pa hasi Hesus.
Segùn Hesus tabata papia ku Nikodemo, El a bisa: “ ‘Mi ta sigurá bo: niun hende no por mira reino di Dios, si e no nase di nobo’. Nikodemo a bis’É: “Kon un hende ku ta hende grandi kaba por bolbe nase? Akaso e por drenta skochi di su mama atrobe i bolbe nase?” Hesus a respond’é: “Mi ta sigurá bo: niun hende no por drenta reino di Dios, si e no nase di awa i spiritu. Un hende ta nase físikamente di su mayornan humano, ma spiritualmente e ta nase di Spiritu Santu. No keda sorprendí pasobra Mi ta bisa bo ku boso mester nase di nobo.” (Huan 3:3-7).
E frase “nase di nobo” lèterlek ta nifiká “nasé di ariba”. Nikodemo tabatin un nesesidat hopi grandi. E tabatin mester di un kambio den su kurason- un transformashon spiritual. Nasementu di nobo, esta, ser nasé di nobo ta un akto di Dios kaminda bida eterno ta wòrdu duna na e persona ku ta kere (2Korintionan 5:17; Tito 3:5; 1 Pedro 1:3; 1 Huan 2:29; 3:9; 4:7; 5:1-4, 18). Huan 1:12,13 ta indiká ku “ser nasé di nobo” tambe ta nifiká “pa bira yunan di Dios” dor di konfiansa den e nòmber di Hesu-Kristu.
E pregunta ku lógikamente ta sigui ta, “Dikon un persona mester wòrdu nasé di nobo? E Apòstel Pablo ta bisa den Efesionan 2:1, “Un tempu boso tambe tabata spiritualmente morto, pa motibu di boso aktonan di desobediensia i boso pikánan”. Na e Romanonan den Romanonan 3:23 el a skibi, “tur hende a peka i ta karesé di Dios su gloria”. Esta, un persona mester wòrdu nasé di nobo pa asina su pikánan por wòrdu pordoná i pa e tin un relashon ku Dios.
Kon esei por wòrdu hasí posibel? Efesionan 2:8-9 ta bisa, “Pasobra boso ta salbá dor di grasia di Dios, pa medio di fe den Kristu! Anto boso no ta haña salbashon a base di boso mes esfuerso, ma e ta un regalo di Dios. No por hasi nada pa gan’é, ya niun hende no por broma”. Ora un persona ta “salbá” el a wòrdu nasé di nobo, spiritualmente renobá, i awor e ta yu di Dios dor di su nasementu nobo. Konfiansa den Hesu-Kristu, Esun ku a paga e kastigu di piká ora El a muri riba krus, ta loke ta nifiká “ser nasé di nobo” spiritualmente. “Un hende ku ta uní ku Kristu ta un kreashon nobo. E kosnan di ántes a pasa bai i loke ta nobo a yega.” (2 Korintionan 5:17).
Si nunka bo no a konfia den Señor Hesu-Kristu komo bo Salbador, lo bo hasi kaso di Spiritu Santu su seña, segùn E ta papia den bo kurason? Bo mester wòrdu nasé di nobo. Lo bo resa e orashon di arepentímentu aki i bira un kreashon nobo den Kristu awe? “Esnan ku sí a asept’É, ku a pone nan konfiansa den su nòmber, El a duna derecho pa bira yu di Dios. Nan no a bira yu di Dios a base di famia, ni na un manera natural, ni dor di deseo di un hende hòmber; Dios mes a sòru pa nan ta su yu.” (Huan 1:12-13).
Si bo ke aseptá Hesu-Kristu komo bo Salbador i wòrdu nasé di nobo, ata aki un ehèmpel di un orashon. Pero kòrda, resando e orashon aki lo no salbabo. Konfiansa den Kristu so por salbabo di piká. E orashon aki ta simplemente un manera pa ekspresá na Dios bo fe den djÉ i yam’É danki pa a perkurá pa bo salbashon. “Señor, mi sa ku mi a peka kontra bo i ku mi ta meresé kastigu. Pero Hesu-Kristu a tuma e kastigu ku ami ta meresé, pa asina pa medio di fe den djE, ami por wòrdu pordoná. Mi ta pone mi konfiansa den Bo pa salbashon. Danki pa bo maravioso grasia i pordon - e regalo di bida eterna! Amen!”
Bo a tuma e desishon di aseptá Kristu dor di algu ku bo a lesa akiriba? Si ta asina, porfabor klék riba e boton akibounan “Mi a aseptá Kristu awe”.
English
Kiko ta nifiká ser un Kristian nasé di nobo?
