Pregunta
Kua ta e kuater leinan spiritual?
Kontesta
E Kuater Leinan Spiritual ta un manera pa kompartí e bon notisia di salbashon, kual ta posibel pa medio di fe den Hesu-Kristu. E ta un manera simpel pa parti e informashonnan importante ku tin den e Evangelionan.
E promé Lei Spiritual ta, “Dios ta stimabu i E tin un plan maravioso pa ku bo bida.” Huan 3:16 ta bisa nos, “Pasobra Dios a stima mundu asina tantu ku El a duna su úniko Yu, pa tur esnan ku pone konfiansa den djE no bai pèrdí, ma haña bida eterno.” Huan 10:10 ta siña nos e motibu dikon Hesus a bin, “Ami a bini pa duna bida, bida na abundansha.” Kiko ta blòkiando nos di Dios su amor? Kiko ta stroba nos di tin un bida di abundansha?
E di dos lei di e Kuater Leinan Spiritual ta, “Humanidat ta manchá na piká i p’esei e ta separá fo’i Dios. Komo resultado, nos no por konosé Dios su plan maravioso pa nos bida.” Romanonan 3:23 ta afirmá e infomashon aki, “Tur hende a peka i ta karesé di Dios su gloria.” Romanonan 6:23 ta mustra nos e konsekuenshanan di piká, “Pasobra e pago di piká ta morto.” Dios a krea nos pa nos tin komunion kun’É. Pero, humanidat a trese piká na mundu, i dor di esei nos a wòrdu separá fo’i Dios. Nos a daña nos relashon ku Dios, kual tabata Su intenshon pa nos tin kun’É. Kiko ta e solushon?
E di tres lei di e Kuater Leinan Spiritual ta, “Hesu-Kristu ta Dios Su ùniko provishon pa nos pikánan. Pa medio di Hesu-Kristu, nos pikánan por wòrdu pordoná i nos relashon ku Dios wòrdu restourá. Romanonan 5:8 ta bisa nos, “Dios sí ta demostrá su amor pa nos dor ku Kristu a muri pa nos miéntras nos tabata pekador ainda.” 1Korintionan 15:3-4 ta informá nos kiko nos mester sa i kere pa nos por wòrdu salbá, “… esta ku Kristu a muri pa nos pikánan, manera Skritura ta bisa; ku nan a der’É, i ku riba e di tres dia El a lanta for di morto, manera Skritura ta bisa…” Hesus mes a deklará ku E ta e ùniko kaminda pa salbashon den Huan 14:6, “Ami ta e kaminda, bèrdat i bida; niun hende no por yega serka Tata, si no ta pa medio di Mi.” Kon mi por risibí e regalo maravioso di salbashon?
E di kuater lei di e Kuater Leinan Spiritual ta, “Nos mester pone nos fe den Hesu-Kristu komo nos Salbador pa asina nos risibí e regalo di salbashon i konosé Dios Su plan maravioso pa ku nos bida.” Huan 1:12 ta deskribí esaki pa nos, “Esnan ku sí a asept’É, ku a pone nan konfiansa den su nòmber, El a duna derecho pa bira yu di Dios.” Echonan 16:31 ta bisa klaramente, “Kere den Señor Hesus i tantu abo komo bo hendenan di kas lo keda salbá!” Nos por ta salbá dor di grasia so, pa medio di fe so, den Hesu-Kristu so (Efesionan 2:8-9).
Si bo ke pone bo konfiansa den Hesu-Kristu komo bo Salbador, ripití e siguiente palabranan na Dios. Bisando e palabranan aki lo no salbabu, pero konfiansa den Kristu si! E orashon aki ta simplemente un manera di ekspresá na Dios bo fe den djE i yam’É danki pa a perkurá pa bo salbashon. “Señor, mi sa ku mi a peka kontra bo i ku mi ta meresé kastigu. Pero Hesu-Kristu a tuma e kastigu ku ami ta meresé, pa asina dor di fe den djE mi por wòrdu pordoná. Mi ta pone mi konfiansa den Bo pa salbashon. Danki pa Bo maravioso grasia i pordon- e regalo di bida eterna! Amen!”
Bo a tuma e desishon di aseptá Kristu dor di algu ku bo a lesa akiriba? Si ta asina, porfabor klék riba e boton akibounan “Mi a aseptá Kristu awe”.
English
Kua ta e kuater leinan spiritual?
