Pregunta
Pastornan/predikadornan femenino? Kiko Beibel ta bisa tokante hende muhé den ministerio?
Kontesta
Podisé un tin niun otro tópiko ku ta wòrdu debatí mas tantu den iglesia awendia, ku no ta e ponensia di hende muhé sirbiendo komo pastor/predikador. Na fin di manera, ta hopi importante pa nos no konsiderá e ponensia aki komo un bataya di hòmber kontra muhé. Tin muhénan ku ta kere ku hende muhé no mester sirbi komo pastor i ku Beibel ta pone restrikshonnan riba muhénan den ministerio, i tin hòmbernan ku ta kere ku hende muhé por sirbi komo predikador i ku no tin ningun restrikshon riba esaki. E ponensia aki no tin nada di aber ku shovinismo ni diskriminashon. E ta un kestion di interpretashon bíbliko.
E palabra di Dios ta proklamá, “Hende muhé mester keda ketu ora ta siña nan; nan mester ta kompletamente sumiso. Mi no ta pèrmití hende muhé duna siñansa ni tin outoridat riba hende hòmber; nan mester keda ketu” (1 Timoteo 2:11-12). Den iglesia, Dios a enkargá hende hòmber i muhé ku diferente ròlnan. Esaki ta e resultado di e manera ku ser humano a wòrdu kreá i e manera ku piká a drenta mundu (1 Timoteo 2:13-14). Dios, pa medio di apòstel Pablo, a impedí hende muhé di sirbi den ròlnan di enseñansa i/ òf outoridat spiritual riba hende hòmber. Esaki ta impedí muhénan di sirbi komo pastor riba hòmbernan, kual seguramente ta inkluhí predikamentu na nan, dunamentu di instrukshon públikamente na nan, i ehersisio di outoridat spiritual riba nan.
Tin hopi hende ku ta ophetá e manera di bista aki tokante hende muhénan den ministerio pastoral. Un ehèmpel komun ku ta wòrdu uzá ta ku nan ta bisa ku Pablo a pone restrikshon riba hende muhé pa nan no duna enseñansa, pasobra durante e promé siglo, hende muhé típikamente no tabata eduká. Pero, niun kaminda den 1 Timoteo 2:11-14 no ta menshoná status di edukashon. Si edukashon tabata un kualifikashon pa ministerio, e orei gran mayoria di e disípulonan di Hesus lo no tabata kualifiká. Un di dos opheshon komun ku ta wòrdu uzá ta ku Pablo a pone restrikshon riba hende muhé na Éfese pa nan no instruí hende hòmber (1 Timoteo a wòrdu skirbí na Timoteo, e pastor di e misa na Éfese). Éfese tabata konosí pa su tèmpel di Artemis, i hende muhé tabata e outoridatnan den e taki di paganísmo einan – p’esei, e teoria ta splika ku Pablo tabata reakshoná solamente riba e kustumbernan femenino di e ídolo di Éfese, i ku e iglesia mester bira diferente. Pero, e buki di 1 Timoteo no ta menshoná Artemis niun kaminda, ni Pablo no ta menshoná e práktika stándart di adoradónan di Artemis komo motibu pa e restrikshonnan den 1 Timoteo 2:11-12.
Un di tres opheshon ta ku Pablo tabata referí na esposo ku esposanan so, i no hòmber ku muhénan en general. E palabra Griego pa “muhé” i “hòmber” den 1 Timoteo 2 por refirí na esposo ku esposanan; pero, e nifikashon básiko di e palabranan aki ta mas amplio ku esakinan. Es mas, e mesun palabranan Griego a wòrdu uzá den versíkulonan 8-10. Ta esposonan so mester hisa nan man santu den orashon sin ningun rabia i pleitu (versíkulo 8)? Ta esposanan so mester bisti modesto, hasi bon obranan i alabá Dios (versíkulonan 9-10)? Klaro ku no. Versíkulonan 8-10 klaramente ta referí na tur hòmber i muhénan, i no solamente esposo ku esposanan. No tin nada den konteksto ku por indiká ku e versíkulonan 11-14 ta limitá na esposo ku esposanan so.
Un otro opheshon kontra e interpretashon di hende muhé den ministerio pastoral ta relashoná ku hende muhénan ku tabatin posishonan di liderasko den Beibel, spesífikamente Miriam, Deborah, i Huldah den Tèstamènt Bieu. Ta bèrdat ku e muhénan aki tabata eskohí dor di Dios pa un servisio speshal na djÉ i ku nan tei komo modelonan di fe, kurashi, i si, liderasko. Pero, e outoridat di hende muhè den Tèstamènt Bieu no ta revelante pa e kestion di pastornan den iglesia. E Epístolanan den Tèstamènt Nobo ta presenta un modelo nobo pa hendenan di Dios – e iglesia, e kurpa di Kristu- i e modelo ei ta enserá un struktura di outoridat ku ta úniko pa iglesia, i no pa e nashon di Israel ni ningun otro entidat di Tèstamènt Bieu.
Argumentonan similar ta wòrdu uzá pa Priskila i Febe den Tèstamènt Nobo. Den Echonan 18, Priskila i Akila a wòrdu presentá komo ministernan fiel pa Kristu. Priskila su nòmber a wòrdu menshoná promé, kisas pa indiká ku e tabata mas prominente den ministerio ku su kasá. Priskila i su kasá a instruí Apollos e evangelio di Hesu-Kristu? Si, den nan propio kas nan a “splik'é e kaminda di Dios na un forma mas bon” (Echonan 18:26). Beibel ta bisa ku Priskila a pastorá un misa òf instruí públikamente òf bira un lider spiritual di un kongregashon di santunan? No. Te asina leu ku nos sa, Priskila no tabata involukrá den un aktividat den ministerio ku ta kontradesí 1 Timoteo 2:11-14.
Den Romanonan 16:1, Febe a wòrdu yamá “diákono” (òf “sirbienta”) den iglesia I Pablo tabata gabé hopi. Pero, meskos ku Priskila, no tin nada den Skritura ku ta indiká ku Febe tabata un pastora òf un instruktora di hende hòmber den misa. “Kapas pa instruí” a wòrdu duná komo un kualifikashon pa lidernan, pero no pa diákononan (1 Timoteo 3:1-13; Tito 1:6-9).
E struktura di 1 Timoteo 2:11-14 ta splika bon kla e motibu dikon hende muhé no por bira pastora. Versíkulo 13 ta kuminsa ku “ademas”, dunando e “kousa” di e deklarashon di Pablo den versíkulonan 11-12. Dikon hende muhé no mester duna enseñansa òf ehersé outoridat riba hende hòmber? “Pasobra Dios a krea Adam promé i despues Eva. Anto no ta Adam ta esun engañá; ta e muhé ta keda engañá i t'é a desobedesé palabra di Dios” (versíkulonan 13-14). Dios a krea Adam promé i despues El a krea Eva pa ta su “ayundante”. E ordu di kreashon tin un aplikashon universal den famia (Efesionan 5:22-23) i tambe den iglesia.
E echo ku Eva a wòrdu engañá ta un motibu ku 1 Timoteo 2:14 ta duna, dikon hende muhé no tin mag sirbi komo pastora òf ehersé outoridat spiritual riba hende hòmber. Esaki no kemen ku hende muhé ta chòmbòn òf ku nan tur por wòrdu engañá mas fasil ku hende hòmber. Si tur hende muhé tabata por a wòrdu engañá fasilmente, e orei dikon nan ta permití pa nan instruí muchanan (kual por wòrdu engañá fasilmente) i otro muhénan (ku supuestamente por wòrdu engañá fasilmente)? E teksto simplemente ta bisa ku muhénan no por instruí hòmbernan òf ku nan no por tin outoridat spiritual riba nan, paso ta Eva ta esun ku a wòrdu engañá. Dios a skohe pa duna hende hòmber e outoridat prinsipal pa instruí den iglesia.
Hopi hende muhé ta ekselente den donnan di hospitalidat, miserikòrdia, enseñansa, evangelismo i yudansa. Hende muhé den iglesia no ta wòrdu impedí di hasi orashon públiko òf di profetisá (1 Korintionan 11:5), sino solamente di outoridat spiritual pa instruí riba hende hòmber. Niun kaminda den Beibel no impedí hende muhé di ehersé e donnan di Spiritu Santu (1 Korintionan 12). Hende muhé, meskos ku hende hòmber, a wòrdu yamá pa ministrá na otronan, pa demostrá e fruta di Spiritu (Galatanan 5:22-23), anto pa proklamá e evangelio na esnan perdí (Mateo 28:18-20; Echonan 1:8; 1 Pedro 3:15).
Dios a outorisá hende hòmber so pa sirbi den posishonnan di enseñansa spiritual den iglesia. Esaki no ta pasobra hende hòmber nesesariamente por instruí mas mihó òf paso hende muhé ta inferior òf menos inteligente (kual no ta e kaso). Esaki ta simplemente e manera ku Dios a diseñá pa e iglesia funshoná. Hende hòmber mester duna bon ehèmpel den liderasko spiritual – den nan bida i nan palabranan. Hende muhé mester tuma un ròl ku menos outoridat. Hende muhé ta wòrdu enkurashá pa instruí otro muhénan (Tito 2:3-5). Beibel tambe no ta impedí hende muhé di instruí mucha. E úniko aktividat ku hende muhé no tin mag di hasi ta dunamentu di enseñansa òf ehersé outoridat spiritual riba hende hòmber. Esaki ta impedí hende muhé di sirbi komo pastor riba hende hòmber. Esaki no ta hasi hende muhé menos importante den ningun sentido, sino mas bien e ta laganan paga mas tinu riba un ministerio ku ta mas konsistente ku e plan di Dios i e donnan ku E a proveé pa por ehersé nan.
English
Pastornan/predikadornan femenino? Kiko Beibel ta bisa tokante hende muhé den ministerio?
