Pregunta
Fo’i ora bo ta salbá, bo ta keda salbá?
Kontesta
Fo’i ora un hende ta salbá, e ta keda salbá? Ora hendenan aseptá Kristu komo nan Salbador, nan ta drenta den un relashon ku Dios, kual ta e garantia ku nan salbashon ta eternamente sigurá. Tin hopi pasashi den Skritura ku ta deklará e echo aki. (a) Romanonan 8:30 ta deklará, “Esnan destiná di antemano pa bira meskos ku su Yu, Dios a yama. Esnan ku El a yama, El a aseptá komo agradabel den su bista. I ku esnan aseptá, El a kompartí su gloria”. E versíkulo aki ta bisa nos ku fo’i n’e momento ku Dios a skohé nos, ta meskos ku nos a wòrdu glorifiká den Su presensia den shelu. No tin nada ku por prevení un kreyente, for di e promé dia, pa wòrdu glorifiká, pasobra Dios a sòru pa esaki den shelu kaba. Fo’i ora un persona wòrdu hustifiká, su salbashon ta garantisá – e ta mesun sigurá ku manera e tabata glorifiká den shelu kaba.
(b) Pablo a hasi dos pregunta krusial den Romanonan 8:33-34 “Ken lo akusá esnan ku Dios a skohe? Ta Dios mes ta aseptá hende komo hustu. Ken lo riska kondená nan? Niun hende! Kristu-Hesus ta e úniko hende ku no solamente a muri, pero tambe a lanta for di morto pa nan. E ta Esun ku ta sintá na man drechi di Dios i ta intersedé pa nos!” Ken lo por hasi un akusashon kontra esnan ku Dios a elehí? Niun hende no por, pasobra Kristu ta nos abogado. Ken por kondená nos? Niun hende no por, pasobra Kristu, Esun ku a muri pa nos, ta Esun ku por kondená. Nos tin tantu e abogado komo e hues komo nos Salbador.
(c) Kreyentenan a wòrdu nasé di nobo (regenerá) na e momentu nan a kere (Huan 3:3; Tito 3:5). Pa un Kristian por pèrdè su salbashon, lo e mester wòrdu de-regenerá. Beibel no ta duna ningun evidensia ku e nasementu nobo por wòrdu kitá for di un hende. (d) Spiritu Santu ta biba den tur kreyente (Huan 14:17; Romanonan 8:9) i E ta batisá tur kreyente den e Kurpa di Kristu (1 Korintionan 12:13). Pa un kreyente pèrdè su salbashon, lo e mester “kita” i wòrdu detachá fo’i e Kurpa di Kristu.
(e) Huan 3:15 ta bisa ku tur ku kere den Hesu-Kristu lo “tin bida eterno”. Si bo ta kere den Kristu awe i tin bida eterno, pero mayan bo pèrdé, e ora ei nunka e no tabata “eterno” mes. P’esei, si bo pèrdè bo salbashon, e promesanan di bida eterno den Beibel lo ta den eror. (f) E argumentu di mas konklusivo, mi ta haña ku Skritura mes ta splik’é mas miho, “Pasobra Mi tin sigur ku ni morto ni bida, ni angel ni outoridat, ni kos presente ni kos futuro, ni podernan spiritual, ni e lugá di mas altu ni esun di mas profundo, ni niun otro kos ku Dios a krea, no por separá nos nunka di e amor ku Dios a mustra nos den persona di Kristu-Hesus nos Señor” (Romanonan 8:38-39). Korda ku e mesun Dios ku a salbá bo ta e mesun Dios ku lo sostené bo. Fo’i ora nos ta salbá nos ta keda salbá. Nos salbashon sin duda ta eternamente sigurá!
English
Fo’i ora bo ta salbá, bo ta keda salbá?
