Pregunta
Dikon Dios ta laga kosnan malu pasa ku bon hende?
Kontesta
Esaki ta un dje preguntanan di mas difísil den teologia. Dios ta eterno, infinito, omnisiente, omnipresente, i omnipotente. Dikon ser humano (ku no ta eterno, infinito, omnisiente, omnipresente òf omnipotente) mester ferwagt di komprondé e sistema di Dios kompletamente? E buki di Job ta papia tokante e kestion aki. Dios a laga Satanas hasi tur loke e tabata ke ku Job, pero e no tabatin pèrmit di mat’é. Kiko tabata e reakshon di Job? “Bon, suponé ku E mata mi, ku mi no tin niun chèns, tòg mi ke bai defendé mi inosensia personalmente serka djE” (Job 13:15). “SEÑOR a duna i SEÑOR a tuma. Alabá sea nòmber di SEÑOR” (Job 1:21). Job no tabata komprondé dikon Dios a pèrmití e kosnan pasa kuné, pero e tabata sa si ku Dios ta bon i p’esei el a keda konfia den djE. Asinaki nos reakshon mester ta tambe.
Dikon kosnan malu ta pasa ku bon hende? E kontesta bíbliko ta ku no ta eksistí “bon” hende. Beibel ta bisa bon kla ku nos tur ta manchá i infektá na piká (Predikador 7:20; Romanonan 6:23; 1 Huan 1:8). Romanonan 3:10-18 no por tabata mas kla tokante e ineksistensia di “bon” hende: “No tin niun ku ta hasi bon, ni sikiera ún! No tin niun ku komprondementu; niun ku ta buska Dios. Pero tur a kohe mal kaminda, perverso tur pareu. Ningun no ta hasi bon, ni sikiera ún! Nan garganta ta manera un graf habrí; nan lenga nan ta usa pa mentira; tras di nan lep tin venenu di víbora. Nan boka ta yená ku maldishon i amargura; nan ta ansioso pa drama sanger inosente. Unda ku nan bira nan ta sembra ruina i destrukshon i nan no konosé kaminda di pas. Nan no tin rèspèt pa Dios”. Tur ser humano riba e planeta aki ta meresé di wòrdu tirá den fièrnu aworaki mes. Kada sekònde ku nos pasa na bida ta solamente pa medio di e grasia i mizerikòrdia di Dios. Asta e mizeria di mas teribel ku nos por eksperensia riba e planeta aki ta mizerikordioso kompará ku loke nos ta meresé, kual ta un fièrnu eterno den e laman di kandela.
Un miho pregunta lo tabata “Dikon Dios ta laga kosnan bon pasa ku mal hende?” Romanonan 5:8 ta deklará, “Dios sí ta demostrá su amor pa nos dor ku Kristu a muri pa nos miéntras nos tabata pekadó ainda.” Apesar di e naturalesa maligno i pekaminoso di hendenan riba mundu, Dios ta stima nos tòg. El a stima nos asina tantu ku El a muri pa asina E paga e debe di nos pikánan (Romanonan 6:23). Si nos risibí Hesu-Kristu komo nos Salbador (Huan 3:16; Romanonan 10:9), nos lo wòrdu pordoná i El a primintí nos ku nos lo tin un kas eterno den shelu (Romanonan 8:1). Loke nos ta meresé ta fièrnu. Loke nos a haña ta bida eterno den shelu si nos yega serka Kristu den fe.
Si, tin bia kosnan malu ta pasa ku hendenan ku nos no ta haña ta meresé nan. Pero Dios tin Su motibunan dikon E ta laga kosnan pasa, sea nos ta komprondé nan òf no. Mas ku tur kos, nos mester kòrda ku Dios ta bon, hustu, E ta stima nos i E ta mizerikordioso. Hopi bia kosnan ta pasa ku nos ku simplemente nos no por komprondé. Pero, na luga di duda den e bondat di Dios, nos reakshon mester ta ku nos ta pone nos konfiansa den djE. “Konfia den SEÑOR ku henter bo kurason i no sea tèrko. Tene kuenta kunÉ den tur loke bo hasi i lo E mustra bo e kaminda korekto” (Proverbionan 3:5-6).
English
Dikon Dios ta laga kosnan malu pasa ku bon hende?
