Pregunta
Masturbashon – e ta un piká segun Beibel?
Kontesta
Beibel nunka no a menshoná masturbashon spesífikamente ni e no ta bisa si e ta un piká òf no. E Skritura ku mas ta wòrdu uzá ora ta papia di masturbashon, ta e historia di Onan den Génesis 38:9-10. Tin hende ta interpretá e pasashi aki dor di bisa ku “basha bo simiña” riba suela ta un piká. Pero, no ta esei e pasashi aki ta bisa. Dios a kondená Onan, no pasobra el a “basha su simiña”, sino paso Onan a nenga di kumpli ku su deber di proveé un heredero pa su ruman hòmber. E pasashi aki no ta bai tokante masturbashon, sino mas bien kumplimentu di un deber familiar. Un di dos pasashi ku sa wòrdu uzá komo evidensia ku masturbashon ta piká ta Mateo 5:27-30. Hesus ta papia kontra deseonan seksual i despues El a bisa, “Si bo man drechi pone bo kai den piká, kòrt'é tira afó”. Aunke e pasashi aki por tin algu di aber ku masturbashon, e chèns ta hopi chikí ku Hesus tabata kiermen masturbashon.
Aunke niun kaminda den Beibel no ta bisa spesífikamente ku masturbashon ta piká, no tin duda ku e akshonnan ku ta kaba na masturbashon ta pekaminoso. Masturbashon kasi semper ta e resultado di deseonan seksual, stimulashon seksual, i/òf imágennan pornográfiko. Ta e problemanan aki mester atendé kuné. Si e pikánan di deseonan seksual, pensamentunan inmoral, i pornografia wòrdu abandoná i vensé, masturbashon lo no ta un problema mas. Hopi hende ta batayá ku sentimentunan di kulpabilidat ora ta konserní masturbashon, siendo ku den realidat, ta hopi mas importante pa nan repentí di e kosnan ku a pone nan yega na e akto ei.
Tin algun prinsipionan bíbliko ku por wòrdu apliká na e asuntu di masturbashon. Efesionan 5:3 ta deklará, “No ta pas pa esnan ku ta pertenesé na e pueblo santu hasi ni menshon mes di kos manera inmoralidat, kualke tipo di impuresa òf avarisia”. Ta difísil pa masturbashon pasa e tèst aki. Beibel ta siña nos, “En todo kaso, sea ku boso ta kome òf bebe, hasi tur kos na honor di Dios” (1 Korintionan 10:31). Si bo no por duna Dios gloria pa algu, bo no mester hasié. Si un persona no ta totalmente konvensí ku un aktividat ta agradá Dios, e orei e ta un piká: “tur loke no ta hasí ku e konvikshon ku fe ta duna, ta piká” (Romanonan 14:23). Es mas, nos mester kòrda ku nos kurpa a wòrdu salbá i ta pertenesé na Dios. “Boso no sa ku boso kurpa ta tèmpel di Spiritu Santu? Dios a duna boso Spiritu Santu i Spiritu Santu ta biba den boso. Boso no ta di boso mes: Dios a kumpra boso i a paga e preis! Usa boso kurpa anto pa glorifiká Dios” (1 Korintionan 6:19-20). E bèrdat grandi aki mester hala nos atenshon na loke nos ta hasi ku nos kurpa. Segun e prinsipionan aki, e konklushon ku masturbashon ta un piká ta bíbliko. Klaramente, masturbashon no ta glorifiká Dios; e no ta evitá aparensia di imoralidat, ni e no ta kuadra ku e echo ku Dios ta doño di nos kurpa.
English
Masturbashon – e ta un piká segun Beibel?
