Pregunta
Kua ta e miho religion pami?
Kontesta
Restourantnan di fast food ta atrahé nos dor di laga nos pidi nos kuminda eksaktamente manera nos ker’é. Tin cafénan ku ta broma ku nan tin mas ku shen diferente sabor i variedat di kòfi. Asta ora di kumpra kas i outo, nos por buska un ku tin tur e opshon nan i karakterístika nan ku nos ke. Nos no ta bibando mas den un mundu di djis chùkuláti, vanilia, i aardbei so. Eskóho ta rei! Bo por haña kasi tur kos ku bo ke según bo smak personal of nesesidatnan.
Awor kiko bo ta pensa di un religion ku ta nèt bon pa bo? Kiko bo ta pensa di un religion kaminda bo no ta haña duele di nada, ku no ta obligábu hasi nada, anto ku no tin masha reglanan ku ta bisabu “hasi esaki” i “no hasi esaya”? E ta posibel, manera mi a kaba di splikabu. Pero religion ta algu ku por wòrdu skohé manera un sabor di ijskrim?
Tin hopi stèm ku ta purba di hala nos atenshon, p’esei dikon nos tinku konsiderá Hesus mihó ku por ehèmpel Mohammad, Confucius, Buddha, of Charles Taze Russel, of Joseph Smith? Apesar di tur kos, un ta tur kaya ta yega Shelu? Un ta tur religion ta básikamente e mesun kos? E bèrdat ta ku no ta tur religion ta e kaminda pa Shelu, meskos ku no ta tur kaya ta hibabu Punda.
Hesus ta e úniko ku ta papia ku outoridat di Dios pasobra Hesus ta e úniko ku a vense morto. Muhammad, Confucius, i e otronan ta putriendo den nan graf te dia djawe. Pero Hesus, pa medio di Su propio poder, a kana sali for di su graf tres dia despues di a muri riba un krus Romano na un manera kruel. Kualke hende ku poder riba morto ta meresé di nos atenshon. Kualke hende ku poder riba morto ta meresé di wòrdu skuchá.
E evidensia ku tin di Hesus su resurekshon ta impaktánte. Pa di prome, tabatin mas ku sinku shen testigu di e Kristu resusitá. Esei ta un montante basta grandi di testigu. Sinku shen stèm no por wòrdu ignorá. Tambe tin e kaso di e graf bashí. E enemigunan di Hesus por a stòp tur e papiamentu di Hesus su resurekshon fàsilmente dor di presentá Su kurpa morto, putriendo, pero nan no tabata tin e kurpa pa mustra hende! E graf tabata bashí! E disípelnan por a horta su kurpa? Praktikamente imposíbel. Pa prevení algu asina, e graf di Hesus a wòrdu vigilá hopi estríktamente dor di sòldánan armá. Teniendo na kuenta ku e siguidonan mas serkáno di djE a hui bai dor di e miedu ku nan tabatin ora di Su aresto i krusifikashon, e chèns ta hopi chikí ku e grupo desorganisá aki di piskadónan, kual tabata morto spantá, por a bai kabes kabes kontra e sòldánan profeshonál i bon di treín nan aki. Ni nan lo no a sakrifiká nan bida – manera mayoria a hasi- pa un fraude. E símpel echo ta ku e resurekshon di Hesus no por wòrdu probá komo falsu.
Atrobe, kualke hende ku tin poder riba morto ta meresé di wordu skuchá. Hesus a demostrá Su poder riba morto; p’esei, nos tinku skucha kiko E tin di bisa. Hesus ta bisa ku E ta e úniko kaminda pa salbashon ( Huan 14:6). E no ta gewoon un kaminda; E no ta un dje hopi kamindanan. Hesus tá e kaminda.
E mesun Hesus ta bisa, “Tur ku ta kansá i kargá, bin serka Mi i Ami lo duna boso sosiegu.” (Mateo 11:28). E mundu aki ta hopi duru i bida ta hopi difísil. Mayoria di nos ta hopi sangrá, batí i heridá. Un ta bèrdat? Awor kiko bo ke? Restourashon of djis un religion? Un Salbador bibu of un dje hopi “profeta” nan morto? Un bon relashon of un par di ritualnan sin sentido? Hesus no ta djis un eskóho- E tá e eskóho!
Hesus ta e “religion” korekto si bo ta buskando pordon (Echonan 10:43). Hesus ta e “religion” korekto si bo ta buskando un bon relashon ku Dios (Huan 10:10). Hesus ta e “religion” korekto si bo ta buskando un kas eterno den Shelu (Huan 3:16). Pone bo fe den Hesu-Kristu komo bo Salbador; lo bo no arepentí! Konfia den djE pa pordon di bo pikánan; lo bo nó wòrdu desapuntá.
Si bo ke un “bon relashon” ku Dios, ata aki un ehèmpel di un orashon. Kòrda, ku ripitiendo e orashon aki of kualke otro orashon lo no salbabu. Ta solamente konfiansa den Hesus por salba bo di piká. E orashon aki ta simplemente un manera pa ekspresá na Dios bo fe den djE i yam’É danki pa a pèrkurá pa bo salbashon. “Señor, mi sa ku mi a peka kontra Bo i ku mi ta meresé kastigu. Pero Hesu-Kristu a tuma e kastigu ku ami ta meresé pa asina pa medio di fe den djE mi por wòrdu pordoná. Mi ta pone mi konfiansa den Bo pa salbashon. Danki pa Bo maravioso grasia i pordon – e regalo di bida eterna! Amen!”
Bo a tuma e desishon di aseptá Kristu dor di algu ku bo a lesa akiriba? Si ta asina, porfabor klék riba e boton akibounan “Mi a aseptá Kristu awe”.
English
Kua ta e miho religion pami?
