Pregunta
Dikon e nasementu Virginal ta asina importante?
Kontesta
E dòktrina di e nasementu virginal ta krusialmente importante (Isaías 7:14; Mateo 1:23; Lukas 1:27, 34). Pa kuminsá, laga nos tira un bista riba kon Skritura ta deskribí e evento aki. Komo kontesta riba e pregunta di Maria, “Kon esaki por sosodé?” (Lukas 1:34), Gabriel ta bis’é, “Spiritu Santu lo baha riba bo i poder di Altísimo lo tapa bo manera un sombra (Lukas 1:35). E angel ta enkurashá Hosé pa e no tene miedu di tuma Maria komo su kasa, ku e palabranan aki: “… e yu ku e ta spera ta di Spiritu Santu” (Mateo 1:20). Den Mateo tin pará ku e vírgen “a resultá ku el a sali na estado promé ku nan a kasa. Esei a sosodé via di Spiritu Santu” (Mateo 1:18). Galatanan 4:4 tambe ta siña nos tokante e Nasementu Virginal: “… El a manda su Yu, ku a nasé di un hende muhé”.
Segun e pasashinan aki, ta hopi kla ku e nasementu di Hesus tabata e resultado di Spiritu Santu trahando den kurpa di Maria. Tantu e inmaterial (e Spiritu) i e material (Maria su barika) tabatin ke haber. Maria dimes, no por a embarasá su mes, i den e sentido aki e tabata simplemente un “medio”. Dios so por a hasi e milager di e Inkarnashon.
Pero, nengando e konekshon físiko entre Maria ku Hesus lo impliká ku Hesus no tabata realmente humano. Skritura ta siña nos ku Hesus tabata kompletamente humano, ku un kurpa físiko manera di nos. El a haña esaki di Maria. N’e mesun momentu, Hesus tabata kompletamente Dios, ku un naturalesa eterno i sin piká (Huan 1:14; 1 Timoteo 3:16; Hebreonan 2:14-17).
Hesus no a nasé den piká; esta, E no tabatin un naturalesa pekaminoso (Hebreonan 7:26). Aparentemente e naturalesa pekaminoso a wòrdu pasá di generashon pa generashon pa medio di e tata (Romanonan 5:12, 17, 19). E Nasementu Virginal a evitá e transmishon di e naturalesa pekaminoso i a pèrmití e Dios eterno bira un hòmber perfekto.
English
Dikon e nasementu Virginal ta asina importante?
