Pregunta
Kon mi por sa e boluntat ku Dios tin pa mi bida?
Kontesta
Ta importante pa nos sa e boluntat di Dios. Hesus a bisa ku Su relashonnan berdadero ta esnan ku sa i ku ta hasi e boluntat di e Tata: “Ken ku hasi boluntat di Dios ta mi ruman hòmber, mi ruman muhé, mi mama” (Marko 3:35). Den e parábola di e dos yunan hòmber, Hesus ta reprochá e saserdotenan importante i e dòktornan di lei, pasobra nan a keda sin hasi e boluntat di e Tata; spesífikamente nan no a “repentí i kere” (Mateo 21:32). Pa hasi e kos mas básiko, e boluntat di Dios ta pa nos repentí di nos piká i konfia den Kristu. Si nos no a tuma e promé paso aki, e ora ei nos no a aseptá e boluntat di Dios ainda.
Fo’i ora nos risibí Kristu pa medio di fe, nos ta bira yunan di Dios (Huan 1:12), i E ta deseá di guia nos riba Su kaminda (Salmonan 143:10). Dios no ta purba di skonde Su boluntat pa nos; E ke revelé na nos. De fakto, El a duna nos hopi - pero hopi direkshonnan kaba den Su Palabra. Nos mester “yama Dios danki bou di tur sirkunstansha, pasobra esei ta loke Dios ta deseá di boso komo hende ku ta kere den Kristu ” (1 Tesalonisensenan 5:18). Nos mester hasi bon obranan (1 Pedro 2:15). I “ta boluntat di Dios pa boso biba den un forma santu i keda leu for di inmoralidat seksual” (1 Tesalonisensenan 4:3).
Nos por sa i tambe proba e boluntat di Dios. Romanonan 12:2 ta bisa, "I no laga e manera di pensa di e mundu akí forma boso, al kontrario, laga Dios transformá boso i duna boso un manera nobo di pensa. E ora ei boso lo konstatá kiko E ke di boso, esta loke ta bon, agradabel i perfekto.” E pasashi aki ta mustra nos un sekuensha importante: un yu di Dios ta nenga di ta konforme na e mundu akí, e mester laga su mes wòrdu transformá dor di e Spiritu. Ora su mente wòrdu renobá ku e kosnan di Dios, e ora ei e por sa e boluntat perfekto di Dios.
Segun ku nos ta buska boluntat di Dios, nos mester ta sigur ku loke nos ta pensando pa hasi, no ta algu ku Beibel ta prohibí. Por ehèmpel, Beibel ta prohibí ladronisia; komo ku Dios a papia klaramente tokante e tópiko aki, nos sa ku no ta Su boluntat pa nos horta fo’i bankonan – nos no mester ni resa pa e kos ei. Tambe, nos mester ta sigur ku loke nos ke hasi, lo glorifiká Dios i tambe yuda nos mes i otronan krese spiritualmente.
Tin bia ta difísil pa konosé e boluntat di Dios, pasobra e ta rekerí pasenshi. Ta normal ku nos ke sa tur boluntat di Dios mesora, pero no ta asina Dios sa funshoná. E ta revelá Su boluntat na nos paso-a-paso – kada paso ta un paso den fe – i E ta laga nos sigui konfi’É. Loke ta importante ta, ku mientras nos ta warda riba mas instrukshon, nos ta okupá nos mes hasiendo e kosnan bon ku nos sa ku mester wòrdu hasí (Hakobo 4:17).
Hopi bia nos ke pa Dios duna nos konseho riba kosnan spesífiko – unda pa bai traha, unda pa bai biba, ken pa kasa kune, kua outo mester kumpra, etc. Dios ta laga nos tuma nos mes desishonnan, i, si nos ta entregá nos mes na djE, E tin Su maneranan di prevení desishonnan inkorekto (Echonan 16:6-7).
Mas mihó nos konosé un persona, mas konsiente nos ta bira di su deseonan. Por ehèmpel, un mucha por wak su bala ta lora bai n’e otro banda di kaya, pero e no ta kore bai tras dje bala, pasobra e sa ku “mi tata lo no ke pa mi hasi esei”. E no mester puntra su tata mes pa konseho den kada situashon partikular; e sa kiko su tata lo bai kontest’é pasobra e konosé su tata. Esaki ta meskos den nos relashon ku Dios. Si nos kana ku Dios, obedesé Su Palabra i stèns riba Su Spiritu, nos por mira ku nos a haña e mente di Kristu (1 Korintionan 2:16). Nos konos’É, i esaki ta yuda nos konosé Su boluntat. E guiansa di Dios ta optenibel fásilmente. “Si bo biba na un manera hustu bo ta hasi bo kaminda règt, si bo hasi maldat, bo mes maldat ta pone bo kai” (Proverbionan 11:5).
Si nos kana hopi serka ku Dios i berdaderamente deseá Su boluntat pa ku nos bida, Dios lo pone Su deseonan den nos kurason. E klave ta pa nos deseá e boluntat di Dios i no nos propio boluntat. “Buska bo goso den SEÑOR i l’E duna bo tur loke bo kurason por deseá” (Salmonan 37:4).
English
Kon mi por sa e boluntat ku Dios tin pa mi bida? Kiko Beibel ta bisa tokante konosimentu di boluntat di Dios?
