Pregunta
Kiko Beibel ta bisa tokante sèks promé ku kasamentu / sèks prematrimonial?
Kontesta
No tin niun palabra Hebreo òf Griego ku ta wòrdu uzá den Beibel ku ta referí eksaktamente na sèks promé ku kasamentu. Beibel sin niun duda ta kondená adulterio i inmoralidat seksual, pero sèks promé ku kasamentu ta wòrdu konsiderá komo inmoralidat seksual? Segun 1 Korintionan 7:2, “si” ta e kontesta sigur: “Komo tin tantu inmoralidat, kada hòmber mester tin su mes esposa i kada muhé su mes esposo”. Den e versíkulo aki, Pablo ta deklará ku matrimonio ta e “kura” pa inmoralidat seksual. 1 Korintionan 7:2 esensialmente ta bisa ku pasobra hende no por kontrolá nan mes i tin asina tantu hende ku ta hasi sèks inmoral pafó di matrimonio, nan mester kasa. Asina nan por satisfasé nan pashonnan na un manera moral.
Komo ku 1 Korintionan 7:2 klaramente ta inkluhí sèks promé ku matrimonio den e definishon di inmoralidat seksual, tur e versíkulonan di Beibel ku ta deklará inmoralidat seksual komo piká, tambe ta deklará sèks promé ku matrimonio komo piká. Sèks promé ku kasamentu ta inkluhí den e definishon bíbliko di inmoralidat seksual. Tin bastante Skritura ku ta deklará ku sèks promé ku matrimonio ta un piká (Echonan 15:20; 1 Korintionan 5:1; 6:13, 18; 10:8; 2 Korintionan 12:21; Galatanan 5:19; Efesionan 5:3; Kolosensenan 3:5; 1 Tesalonisensenan 4:3; Hudas 7). Beibel ta promové abstenensia total promé ku matrimonio. Sèks entre un esposo ku su esposa ta e úniko forma di relashon seksual ku Dios ta aprobá (Hebreonan 13:4).
Muchu hopi bia nos ta pone atenshon riba e aspekto “rekreativo” di sèks sin rekonosé ku e tin un otro aspekto – prokreashon. Sèks den matrimonio ta plasentero, i Dios a diseñé na e manera ei. Dios ke pa hende hòmber i muhé disfrutá di aktividatnan seksual den matrimonio. E Kanto Di Tur Kanto i varios otro pasashinan di Beibel (manera Proverbionan 5:19) klaramente ta deskribí e plaser di sèks. Pero, e pareha mester komprondé ku Dios Su intenshon pa sèks ta inkluhí e produkshon di yu. P’esei, ora un pareha praktiká sèks promé ku matrimonio ta dòbel robes – nan ta disfrutá di plasernan ku no ta diseñá pa nan, i nan ta kore e chèns di krea un bida humano pafó di e struktura di famia ku Dios a destiná pa tur mucha.
Aunke utilidat no ta determiná bon i malu, pero si e mensahe di Beibel tokante sèks promé ku matrimonio lo a wòrdu obedesé, lo tabatin hopi menos malesanan seksualmente transmití, hopi menos aborto, hopi menos mamanan sin esposo i embarasonan indeseá, i hopi menos muchanan ku ta krese sin tur dos mayor den nan bida. Abstenensia ta e úniko opshon ku Dios a duna nos ora ta trata di sèks promé ku matrimonio. Abstenensia ta salba bida, protehá beibinan, ta duna relashon seksual e balor adekuá, i, mas importante, ta honorá Dios.
English
Kiko Beibel ta bisa tokante sèks promé ku kasamentu / sèks prematrimonial?
