Pregunta
Siguridat eterno ta Bíbliko?
Kontesta
Ora hende aseptá Kristu komo nan Salbador, nan ta drenta den un relashon ku Dios kual ta garantisá nan siguridat eterno. Hudas 24 ta deklará, “E úniko Dios, nos Salbador, tin poder pa protehá boso pa boso no kai i pa presentá boso sin mancha i yená ku goso den su presensia glorioso” E poder di Dios ta kapas di prevení e kreyente di kai. Ta E ta sòru, no nos, pa presentá nos dilanti Su presensia glorioso. Nos siguridat eterno ta e resultado di kon Dios a kuida nos, i no ku nos a mantené nos propio salbashon.
Señor Hesu-Kristu a proklamá, “Ami ta duna nan bida eterno i nunka nan lo no bai pèrdí; niun hende no por ranka nan kita for di mi man. Mi Tata ku a duna Mi nan, ta mas grandi ku tur i niun hende no por ranka nan kita for di man di mi Tata” (Huan 10:28-29b). Tantu Hesus komo Dios Tata tin nos firmemente den nan man. Ken por separá nos for di e gara di tantu e Tata komo e Yu?
Efesionan 4:30 ta bisa nos ku kreyentenan ta “seyá pa riba e dia di redenshon.” Si kreyentenan no tabatin seguridat eterno, e ora ei e seya no por tei te riba e dia di redenshon, sino solamente te dia un piká, apostasía òf rechaso di fe wòrdu kometí. Huan 3:15-16 ta bisa nos ku tur ku ta ku kere den Hesu-Kristu lo tin “bida eterno”. Si un persona wòrdu prometí ku e tin bida eterno, pero despues esaki wòrdu kitá, e ora ei nunka e no tabata “eterno” mes. Si siguridat eterno no tabata bèrdat, e promesanan di bida eterno den Beibel lo tabata den eror.
E argumentu di mas grandi pa siguridat eterno ta pará den Romanonan 8:38-39, “Pasobra Mi tin sigur ku ni morto ni bida, ni angel ni outoridat, ni kos presente ni kos futuro, ni podernan spiritual, ni e lugá di mas altu ni esun di mas profundo, ni niun otro kos ku Dios a krea, no por separá nos nunka di e amor ku Dios a mustra nos den persona di Kristu-Hesus nos Señor.” Nos siguridat eterno ta basá riba e amor di Dios pa esnan ku El a salbá. Nos siguridat eterno a wòrdu kumprá dor di Kristu, prometí dor di e Tata, i seyá dor di Spiritu Santu.
English
Siguridat eterno ta Bíbliko?
