یسوع مسیح کون ہے؟




سوال: یسوع مسیح کون ہے؟

جواب:
"کیہ رب دی ہوند ہے؟" اس سوال دے اُلٹ بہت گھٹ لوک سوال کردے ہین بئی کیہ یسوع مسیح دی کوئی ہوند سی۔ عام طور تے ایہہ قبولیا جاندا ہے بئی یسوع سچی مچی اک بندہ سی جیہڑا 2000 ورھے پہلاں اسرائیل دے دھرتی تے وسیا۔ بحث اوس ویلے چھوہی جاندی ہے جدوں یسوع دی پوری پچھان بارے وچاروٹاندرے دی گل آؤندی ہے۔ نیڑے تیڑے ہر وڈا مذہب سکھاؤندا ہے بئی یسوع اک نبی یاں اک چنگا گرو یاں اک ربی صفتاں والا جی سی۔ مسئلہ ایہہ ہے بئی پاک کلام سانوں دسدا ہے بئی یسوع حدوں ودھ نبی توں اگے، اک چنگا گرو، یاں ربی صفتاں والا جی سی۔

سی۔ ایس۔ لوئس اپنی کتاب نری عیسائیت وچ ایہہ لکھدا ہے: "میں ایتھے ہر کسے نوں اک وڈی یبھلی مارن توں بچاؤن دا اُپرالا کر رہیاں جیہڑی لوک اکثر اوہدے [یسوع مسیح] بارے ماردے ہین: 'میں یسوع نوں اک وڈے روحانی گرو دے طور تے قبولن تے تیار ہاں، پر میں اوہدے رب ہون دے دعوے نوں نہیں قبولدا۔' ایہہ اک ایہو جہی گل ہے جیہڑی سانوں آکھن توں ولائی رکھنا چاہیدا ہے۔ اک جی جیہڑا اُکا اک بندہ سی اتے اوہو جہیاں گلاں کردا سی جویں دیاں گلاں یسوع کریا کردا سی اک وڈا روحانی گرو نہیں ہوئے گا۔ اوہ یاں تے اک جھلا ہوئے گا – اک ایہو جہے بندے دی پدھر دا کملا جیہڑا آکھدا ہے بئی اوہ اک اُبلیا ہویا آنڈا ہے – یاں فیر اوہ دوزخ دا شیطان ہوئے گا۔ تہانوں اک چون چننا پوے ۔ یاں تے ایہہ بندہ رب دا پُتر سی، اتے ہے، یا فیر اک پاگل یاں کجھ ایہدے توں وی رہیا ہویا۔ تسیں اوہنوں کملا آکھ کے اوہدی بکواس بند کروا سکدے ہو، تسیں اوہدے اُتے تھُک سکدے ہو اتے اک بھوت آکھ کے اوہنوں قتل کر سکدے ہو؛ یا تسیں اوہدے پیراں تے ڈگ سکدے ہو اتے اوہنوں آقا تے رب آکھ سکدے ہو۔ پر سانوں اوہدے اک وڈا انسانی گرو ہون دے طور تے اوہدیاں نکڑمیاں گلاں دی حمایت نہیں کرنی چاہیدی۔ اوہنے ساڈے لئی کوئی ایہو جہیا راہ کھلا نہیں چھڈیا۔ اوہدا کوئی ارادہ نہیں سی۔"

فیر، یسوع نے کیہ ہون دا دعویٰ کیتا؟ پاک کلام کیہ دسدا ہے بئی اوہ کون ہے؟ پہلاں یسوع دے یوحنا باب 10 آیت 30 وچ آکھے لفظاں نوں ویکھو۔ "میں اتے پیو اک ہاں۔" پہلی جھات وچ، ہو سکدا ہے بئی ایہہ رب ہون دا دعویٰ نہ جاپدا ہوئے۔ پر، اوہدے بیان تے یہودیاں دا ردِعمل ویکھو، "یہودیاں نے آکھیا، اسیں تینوں چنگے کرماں پاروں نہیں سگوں کفر دے پاروں کر رہے ہاں، کیوں جے توں، ایک عام بندہ، رب ہون دا دعویٰ کردا ایں'" (یوحنا باب 10 آیت 33)۔ یہودی یسوع دے بیان نوں رب ہون دا دعویٰ سمجھے۔ ہیٹھلیاں آئتاں وچ، یسوع کدھرے وی یہودیاں نوں ایہہ آکھ کے اوہناں دی آکھی نوں نہیں سدھاردا بئی 'میں رب ہون دا دعویٰ نہیں کیتا۔" ایہہ گل سینت ماردی ہے یسوع ایہہ بیان دے کے بئی "میں اتے پیو اک ہاں" (یوحنا باب 10 آیت 30) سچی مچی آکھ رہیا سی بئی اوہ رب ہے۔ یوحنا باب 8 آیت 58 اک ہور مثال ہے: "'میں تہانوں سچ دسناں،' یسوع نے جواب دتا۔ "ابراہیم دے جمن توں پہلاں، میں ہاں!'" فیر، جواب وچ، یہودیاں نے یسوع نوں سنگسار کرن دی نیت نال روڑے چُک لئے (یوحنا باب 8 آیت 59)۔ یسوع دے اپنی پچھان دا اعلان "میں ہاں" دے نال کرن نال سدھی سینت پرانے عہدنامے وچ رب لئی ورتے جاندے ناں ول وجدی ہے (خروج باب 2 آیت 14)۔ یہودی یسوع نوں مُڑ کے کیوں سنگسار کرنا چاہوندے سن نے اوہنے ایہو جہی کوئی گل نہیں کیتی جیہنوں اوہ کفر سمجھدے، سر عام، رب ہون دا دعویٰ کرنا؟

یوحنا باب 1 آیت 1 کہندی ہے " کلام رب سی۔" یوحنا باب1 آیت 14 کہندی ہے " کلام مجسم ہو گیا۔" ایہہ صاف نتارا ہے بئی یسوع پنڈے دے وچ رب ہے۔ توماس حواری یسوع نوں کہندا ہے، "میرا خداوند میرا رب" (یوحنا باب 20 آیت 28)۔ یسوع نے اوہنوں ٹھیک نہیں کیتا۔ پولس حواری اوہنوں انج بیان کردا ہے، "۔۔۔ ساڈا بزرگ رب اتے مکتی داتا، یسوع مسیح" (ططس باب 2 آیت 13)۔ حواری پطرس وی ایہو کہندا ہے، "۔۔۔ ساڈا رب اتے مکتی داتا یسوع مسیح" (2 پطرس باب 1 آیت 1) رب باپ وی یسوع دی پوری پچھان دا گواہ ہے، "پر پُتر بارے اوہ آکھدا ہے۔ 'تیرا تخت، او ربا، سدا ای رہوے گا، تے راست باز تیری بادشاہی دے وارث ہون گے"۔ پرانے عہد نامے وچ مسیح دیاں پیش گوئیاں اوہدے رب ہون دا اعلان کردیاں ہین، "ساڈے لئی اک بال جمے گا، سانوں اک پتر دتا گیا ہے، اتے بادشاہی اوہدے موڈھیاں تے ہوئے گی۔ اتے اوہ نویکلا صلاح کار، قادر رب، ہمیش رہن والا پیو، سلامتی دا شہزادہ اکھوائے گا" (یسعیاہ باب 9 آیت 6)۔

ایس لئی، جیویں کہ سی ۔ ایس۔ لوئس دلیل دیندا ہے، یسوع نوں اُکا اک چنگا گرو مننا کوئی حل نہیں رہ جاندا۔ یسوع نے رب ہون دا صاف اتے نہ ردن جوگ دعویٰ کیتا سی۔ جے اوہ رب نہیں ہے، فیر اوہ جھوٹھا ہے، اتے ایس لئی اک پیغمبر، یاں ربی صفتاں والا جی نہیں ہے۔ یسوع دے لفظاں نوں بیان کرن دے جتناں وچ، نویں "عالم" دعویٰ کردے ہین "اصلی تاریخی یسوع" نے بہت ساریاں اوہ گلاں نہیں آکھیاں جیہڑیاں بائبل وچ اوہدے ناویں لائیاں گئیاں ہین۔ یسوع نے کیہ آکھیا تے کیہ نہیں آکھیا ایہدے بار رب دے کلام تے حجتاں کرن والے اسیں کون ہونے ہاں؟ کیویں اک "عالم" جیہڑا یسوع توں دو ہزار ورھے مگروں دا ہے یسوع نے کیہ آکھیا تے کیہ نہیں آکھیا ایس بارے اوہناں توں بہتر کویں وچار سکدا ہے جیہڑے یسوع دے نال رہے، نال سیوا کیتی، اتے جیہناں نوں یسوع نے آپ سکھایا (یوحنا باب 14 آیت 26)؟

یسوع دی اصلی پچھان بارے سوال اینا اچیچا کیوں ہے؟ ایہدی اینی اچیچتا کیوں ہے بئی یسوع رب ہے یاں نہیں ہے؟ سب توں وڈی وجہ بئی یسوع نوں رب ہونا چاہیدا ہے اوہ ایہہ ہے بئی جے اوہ رب نہیں ہے، اوہدی موت سارے جہان دے پاپاں دا دین دین لئی کافی نہ ہوندی (1 یوحنا باب 2 آیت 2)۔ صرف رب ہی ایہہ بے حد دین دے سکدا ہے (رومیوں باب 5 آیت 8؛ کرنتھیوں باب 5 آیت 21)۔ یسوع نوں رب بننا ہی پینا سی تاں جے اوہ ساڈے قرضے لاہ سکدا۔ یسوع نوں انسان بننا ہی پینا سی تاں جے اوہ مر سکدا۔ مُکتی صرف یسوع مسیح تے ایمان رکھن راہیں ملنی ہے۔ یسوع ایسے لئی رب ہے کیوں جے اوہو ای اک مکتی دا راہ ہے۔ یسوع رب ایس لئی ہے کیوں جے اوہ اعلان کردا ہے، "میں راہ اتے سچائی اتے حیاتی ہاں۔ کوئی وی پیو تیکر نہیں جا سکدا جدوں تیکر اوہ میرے راہیں نہیں جاندا" (یوحنا باب 14 آیت 6)۔



پنجابی دے مڈھلے صفحے تے جاؤ



یسوع مسیح کون ہے؟