کیہ مرن مگروں حیاتی اے؟




سوال: کیہ مرن مگروں حیاتی اے؟

جواب:
کیہ مرن مگروں حیاتی اے؟ کلام پاک سانوں دسدا اے، "انسان جیہڑا زنانی توں جمیا اے تھوڑے دناں دا اے تے دکھ دے نال بھریا اے۔ اوہ پھل وانگوں نکلدا تے وڈھ دتا جاندا اے؛ اوہ پرچھاویں وانگوں اُڈ جاندا اے تے رُکدا نہیں، جے بندہ مر جائے تے کیہ اوہ فیر جیوے گا" (ایوب 14 باب 1 تے 2 اتے 14 آیت)؟

ایوب وانگوں ساڈے ساریاں دا ایس سوال نال بڑا نیڑلا سانگا اے۔ کہ ٹھیک مرن مگروں ساڈے نال کیہ ہوندا اے؟ کیہ اسیں بڑی سہج دے نال مُک جاواں گے؟ کیہ حیاتی گومن والا اک بوہا اے جیہدے وچوں لنگھ کہ اسیں دھرتی تے آؤندے تے جاندے آں تے ایس راہ چوں اسیں اپنے لئی عزت وی حاصل کردے آں۔ کیہ ہر کوئی اکو ای طرحاں دی تھاں تے جاندا اے، یاں اسیں وکھری وکھری تھاں جاندے آں؟ کیہ اصل وچ اسمان تے دوزخ نیں، یاں ایہہ اک وچار ای اے۔

کلام پاک سانوں دسدا اے کہ اوتھے اُکا مرن توں مگروں ای حیاتی نہیں سگوں ہمیش دی حیاتی اے جیہڑی بہت وڈی تے عزت والی اے"۔۔۔ جیہڑیاں شیواں نہ اکھاں نے ویکھیاں نہ کناں نے سُنیاں نہ بندے دے دل وچ آئیاں اوہ ساریاں رب نے اپنے محبت کرن والیاں لئی تیار کیتاں نیں" (1۔کرنتھیوں 2 باب 9 آیت)۔

یسوع مسیح، مجسم رب ہویا، تے دھرتی تے سانوں ہمیش دی حیاتی دا تحفہ دین لئی آیا۔ "حالانکہ اوہ ساڈیاں غلطیاں دے سببوں پھٹڑ کیتا گیا تے ساڈی بدی دا کرکے اوہ کچلیا گیا۔ ساڈی ای سلامتی لئی اوہدے تے سیاست ہوئی تانجے اوہدے مار کھان نال اسیں شفا پائیے" (یسعیا 53 باب 5 آیت)۔

یسوع نے اوہ سزا اپنے اُتے لے لئی جیہدے اسیں سارے حقدار سی تے اپنی حیاتی نوں قربان کردتا۔ تیجے دن دے مگروں، اوہنے قبر وچوں جیوندا ہو کے اپنے آپ نوں فتح مند ثابت کیتا، روح وچ جثے وچ۔ اوہ اپنے ہمیش رہن والے اسمانی گھر وچ چُکے جان توں پہلے دھرتی تے چالیہہ دن تیکر رہیا جیہدے ہزاراں گواہ سی۔ رومیوں 4 باب 25 آیت دسدی اے، "اوہ ساڈے قصوراں لئی پھڑیا گیا تے سانوں چنگا بناؤن لئی جیوندا کیتا گیا"۔

مسیح دا مردیاں وچوں جی اُٹھنا اک لکھی پڑھی گل اے۔ پولوس رسول نے اجہیے لوکاں دے سوالاں دا ساہمنا کیتا جیہڑے اس گل دی سچائی دے پکے گواہ سی، تے اوہناں وچوں کوئی وی ایس سچائی دے ساہمنے نہ ٹکیا ۔ مردیاں وچوں جی اُٹھنا ای مسیحی ایمان دی نینہہ اے؛ کیونجے مسیح مُردیاں وچوں جی اُٹھیا، اسیں ایمان رکھ سکنے آں، کہ اوہ سانوں وی مُردیاں وچوں جیوندا کرے گا۔

پولوس رسول نے پہلے مسیحیاں نوں سمجھایا جیہڑے ایس گل تے یقین نہیں کردے سن: "پس جدوں مسیح دے بارے ایہہ منادی کیتی جاندی اے کہ اوہ مُردیاں وچوں جی اُٹھیا تے تہاڈے وچ کجھ کیویں کہندے نیں کہ مُردیاں دی قیامت تے ہے ای نہیں؟ جے مُردیاں دی قیامت نہیں تے مسیح وی نہیں جی اُٹھیا" (1۔کرنتھیوں 15 باب 12 تے 13 آیت)۔

اُکا مسیح ای مُردیاں وچوں جی اُٹھن والیاں وچ پہلوٹھا اے جیہنوں فیر جیوندہ کیتا گیا۔ جثے موت آدم راہیں آئی ، آدم ، جیہدے نال اسیں سانگا رکھنے آں۔ پر اوہ سب جیہڑے رب دے ٹبر وچ گود لئے گئے نیں اوہناں نوں نویں حیاتی یسوع مسیح تے ایمان لیاؤن نال دتی جاوے گی (1۔کرنتھیوں 15 باب 20 توں 22 آیت)۔

اُنج ای جیویں رب نے یسوع مسیح نوں جیوندا کیتا، انج ای یسوع دے فیر آؤن تے سانوں جیوندا کیتا جاوے گا (1۔کرنتھیوں 6 باب 14 آیت)۔

بھاویں سانوں ساریاں نوں جیوندا کیتا جاوے گا، پر سارے اکٹھے اسمان تے نہیں جان گے۔ ہر بندے نوں ایس حیاتی وچ اک موقع دتا جاوے گا جیہدے توں اوہ بندہ یا زنانی اپنے آپ دا جائزہ لین گے کہ ا وہ ہمیش دی حیاتی لئی کتھے جان گے۔ کلام پاک دسدا اے کہ سانوں اکو واری موت آوے گی، مگروں عدالت ہووے گی (عبرانیوں 9 باب 27 آیت)۔ جیہڑے لوک اپنے آپ نوں چنگا بناؤندے نیں اوہ ہمیش دی حیاتی لئی آسمان دی بادشاہی وچ داخل ہون گے، پر بے ایمان ہمیش دی سزا لئی دوزخ وچ جان گے (متی 25 باب 46 آیت)۔

دوزخ، جیویں آسمان اُکا اک وجود نوں ای نہیں بیان کردا، پر ایہہ اک اصل جگہ بارے دسدا اے۔ ایہہ اک جگہ اے جتھے بدکار لوک رب دے ہمیش تے کدی نہ مکن والے عذاب وچ آزمائش وچ رہن گے۔ اوہ جان بجھ کہ دکھ تے شرم، افسوس تے ذلت دے نال، جذباتی ، ذہنی تے جسمانی عذاب سہن گے۔ دوزخ نوں دسیا گیا اے جیویں ڈونگھا ٹویا (لوقا 8 باب 31 آیت؛ مکاشفہ 9 باب 1 آیت)، تے اک اگ دی جھیل، گندھک دے نال سڑدی ہوئی، جتھے رہن والے دن تے رات ہمیش لئی عذاب وچ رہن گے (مکاشفہ 20 باب 10 آیت)۔ اوتھے رونا، دنداں دا پیہنا ہووے گا، جو بہت شرمندگی تے غصے نوں ظاہر کردا اے (متی 13 باب 42 آیت)۔ ایہہ اک جگہ اے، "جتھے اوہناں دا کیڑا نہیں مردا تے اگ وی نہیں بُجھدی" (مرقس 9 باب 48 آیت)۔ "رب نوں سریر دے مرن نال کجھ خوشی نہیں، پر ایس توں اے کہ سریر اپنی راہ توں باز آئے تے جیوندا رہے" (حزقی ایل 33 باب 11 آیت)۔ پر اوہ ساڈے توں زور دے نال فرمانبرداری نہیں کرواؤندا، پر اسیں اوہنوں رد کرنے آں، اوہ ساڈے تے نظر رکھدا اے پر جیہناں شیواں دی سانوں لوڑ اے سانوں دیندا اے۔ بھاویں اسیں اوہدے توں دور رہیے۔

دھرتی تے حیاتی اک آزمائش اے۔ کیہ تیاری اے کہ کیہ ہون والا اے۔ رب دی حضوری وچ ایمانداراں لئی تے اے ہمیش دی حیاتی اے۔ پس اسیں کیویں چنگے بن سکنے آں تے کیویں ہمیش دی حیاتی پا سکنے آں؟ ایتھے اُکا اک ای رستہ اے۔ رب دے پتر یسوع مسیح تے یقین تے ایمان لیاؤنا۔ یسوع نے آکھیا، "یسوع نے اوہنوں آکھیا قیامت تے حیاتی تے میں آں۔ جیہڑا میرے تے ایمان لیاؤندا اے بھاویں اوہ مر جائے تے فیر وی جیوندا رہوے گا۔ تے جیہڑا جیوندا اے تے میرے تے ایمان لیاؤندا اے اوہ کدی وی نہیں مرے گا۔۔۔" (یوحنا 11 باب 25 تا 26 آیت)۔

ہمیش دی حیاتی دا مفت تحفہ ہر کسے لئی موجود اے، پر اوہ چاہوندا اے کہ اسیں دنیا دیاں سدھراں نوں چھڈئیے تے اپنے آپ نوں رب لئی وقف کرئیے۔ "جیہڑا پتر تے ایمان لیاؤندا اے ہمیش دی حیاتی اوہدی اے۔ پر جیہڑا پتر دی نہیں من دا حیاتی نوں نہ ویکھے گا، سگوں اوہدے تے رب دا غضب رہندا اے" (یوحنا 3 باب 36 آیت)۔ سانوں اپنی موت دے مگروں اپنے پاپاں توں توبہ کرن دا موقع نہیں ملے گا کیونجے جدوں اسیں اک واری رب نوں اپنے ساہمنے ویکھ لیا، فیر ساڈے کول اوہدے تے یقین کرن توں ہور کوئی چارہ نہیں ہووے گا۔ اوہ چاہوندا اے کہ اسیں ہن ای اوہدے تے ایمان لیائیے تے پیار نال آئیے۔ جے اسیں یسوع مسیح دی موت نوں قبول کرنے آں جیہدے نال مُل تاریا گیا ساڈی پاپ دے نال بھری ہوئی نابری دی جیہڑی رب دے خلاف سی۔ سانوں دھرتی تے اُکا بامعنی زندگی دی ضمانت ای نہیں ملدی، سگوں نال ای مسیح دی حضوری وچ دائمی حیاتی وی ملدی اے۔

جے تسی یسوع نوں اپنا مکتی داتا قبول کردے او، ایتھے اک دعا دا نمونہ اے۔ یاد رکھو، ایس دعا نوں پڑھن یاں کسے ہور دعا نوں پڑھن نال تہانوں مکتی نہیں مل سکدی ۔ اُکا مسیح تے ایمان لیاؤ اوہ تہانوں تہاڈے پاپاں توں مکتی دے سکدا اے۔ ایہہ دعا سادہ جہیا اک رستہ اے رب دے نال تہاڈے ایمان دے اظہار دا تے اوہدا شکر کرو کہ اوہنے تہانوں مکتی دتی اے۔ "ربا! میں جانناں کہ میں تیرے خلاف پاپ کیتا اے تے میں سزا دا حقدار آں۔ پر جیہڑی سزا دا میں حقدار سی یسوع مسیح نے اوہ سزا اپنے اُتے لے لئی پس اوہدے تے ایمان نال میں معافی پا لئی اے۔ میں اپنے پاپاں توں دور رہواں گا تے اپنا ایمان تیرے تے رکھاں گا اپنی مکتی لئی۔ میں شکر کرناں تیرے اجہے فضل تے بخشش دا۔ جیہڑا ہمیش دی حیاتی دا تحفہ اے آمین"۔

جو کجھ تسیں ایتھے پڑھیا ہے اوہدے پاروں کیہ تسیں مسیح لئی کوئی فیصلہ کر لیا ہے؟ جے انج ہے، مہربانی کرکے ہیٹھاں "میں اج مسیح نوں قبول کیتا" دے بٹن تے کلک کرو۔



پنجابی دے مڈھلے صفحے تے جاؤ



کیہ مرن مگروں حیاتی اے؟