سوال
مکتی دا چارا / مکتی دا طریقہ کیہ ہے؟
جواب
کیہ تسیں بھکھے ہو؟ پنڈے دی بھکھ نہیں، پر کیہ تہانوں حیاتی وچ کسے ہور چیز دی بھکھ ہے؟ کیہ تہاڈے دُھر اندر کوئی اجیہی شے ہے جیہدی کدے وی تسلی ہوندی نہیں جاپدی؟ جے انج ہے، یسوع راہ ہے! یسوع نے آکھیا، "حیاتی دی روٹی میں ہاں۔ جیہڑا وی میرے ول آؤندا ہے اوہ کدے بھکھا نہیں مُڑے گا، اتے جیہڑا وی میرے تے ایمان رکھے گا کدے وی ترہایا نہیں رہے گا" (یوحنا باب 6 آیت 35)۔
کیہ تہانوں سمجھ نہیں لگدی؟ کیہ تہانوں لگدا ہے بئی تہانوں کدے وی راہ یاں حیاتی دا مقصد نہیں لبھ سکدا؟ کیہ انج جاپدا ہے بئی کسے نے بتیاں بجھا دتیاں ہین اتے تہانوں بٹن نہیں لبھدا؟ جے انج ہے، یسوع راہ ہے! یسوع نے اعلان کیتا، "میں جہان دا چانن ہاں۔ جیہڑا میرے آکھے چلدا ہے کدے وی ہنیرے وچ نہیں جاوے گا، سگوں حیاتی دا چانن پاوے گا" (یوحنا باب 8 آیت 12)۔
تہانوں کدے انج لگا ہے بئی تسیں کدے بندی خانے وچ ہو؟ کیہ تسیں بہت سارے در کھڑکائے ہین، تے تہانوں اوہناں پچھے صرف سُنج اتے بے مقصدی ہی لبھی ہے؟ کیہ تسیں اک چنگی حیاتی وچ وڑن دا راہ لبھ رہے ہو؟ جے انج ہے، یسوع راہ ہے! یسوع ہوکا دیندا ہے، "میں در ہاں؛ جیہڑا میرے راہیں وڑے گا مکت ہو جاوے گا۔ اوہ اندر باہر آیا جایا کرے گا اتے نعمت پاوے گا" (یوحنا باب 10 آیت 9)۔
کیہ دوجے لوک سدا تہانوں ہینا سمجھدے ہین؟ کیہ تہاڈے سانگے کھوکھلے اتے سکھنے رہے ہین؟ کیہ انج جاپدا ہے بئی ہر کوئی تہانوں ورتن دے جتن کر رہیا ہے؟ جے انج ہے، یسوع راہ ہے! یسوع نے آکھیا، "میں چنگا چروال ہاں۔ چنگا چروال اپنی حیاتی بھیڈاں دے ناویں لا دیندا ہے۔ میں چنگا چروال ہاں؛ میں اپنی بھیڈ نوں جان دا ہاں تے میری بھیڈ مینوں جان دی ہے" (یوحنا باب 10 آیت 11 اتے 14)۔
کیہ تہانوں حیرانی ہوندی ہے بئی ایس حیاتی مگروں کیہ ہون والا ہے؟ کیہ تسیں اپنی حیاتی صرف اوہناں شیواں لئی لنگھاؤندیاں اَک گئے ہو جیہڑیاں سڑ جاندیاں ہین یاں اوہناں نوں زنگال لگ جاندا ہے؟ کیہ تہانوں کدے کدائیں ایہہ شک پیندا ہے بئی حیاتی دا کوئی مطلب وی ہے؟ کیہ تسیں مرن توں مگروں جینا چاہوندے ہو؟ جے انج ہے، یسوع راہ ہے! یسوع نے اعلان کیتا۔ "میں قیامت اتے حیاتی ہاں۔ جیہڑا میرے تے ایمان لیاوے گا جیوندا رہے گا، بھاویں اوہ مر وی جاوے؛ اتے جیہڑا جیوندا ہے اتے میرے تے ایمان رکھدا ہے اوہ کدے وی نہیں مرے گا" (یوحنا باب 11 آیت 25 تے 26)۔
رستہ کیہ ہے؟ سچائی کیہ ہے؟ حیاتی کیہ ہے؟ یسوع نے جواب دتا، " میں راہ ہاں اتے میں سچائی ہاں اتے حیاتی ہاں۔ میرے وسیلے دے بنا کوئی وی پیو کول نہیں آ سکدا" یوحنا باب 14 آیت 6)۔
جیہڑی بھک تہانوں محسوس ہوندی ہے اوہ روحانی بھکھ ہے، اتے اوہ اُکا یسوع نال ہی مٹ سکدی ہے۔ اکو اک یسوع ہی ہے جیہڑا ہنیرے مٹا سکدا ہے۔ یسوع حیاتی نوں رجاؤن دا در ہے۔ یسوع اوہ سجن اتے چروال ہے جیہنوں تسیں لبھدے رہے ہو۔ یسوع حیاتی ہے – ایس جہانے وی تے اگلے جہان وی۔ یسوع مکتی دا راہ ہے!
جس وجہ توں تسیں بھکھے ہو، جس وجہ توں تسیں ہنیرے وچ گواچے جاپدے ہو، جس وجہ توں تسیں حیاتی دے معنے نہیں لبھ سکدے، اوہ ایہہ ہے بئی تسیں رب نالوں نکھڑے ہوئے ہو۔ پاک کلام سانوں دسدا ہے بئی اسیں ساریاں نے پاپ کیتا ہے، اتے ایسے لئی رب نالوں نکھڑ گئے ہاں (واعظ باب 7 آیت 20؛ رومیوں باب 3 آیت 23)۔ جیہڑی وِتھ تسیں اپنے دل وچ محسوس کردے ہو اوہ ایہہ ہے پئی رب تہاڈی حیاتی وچوں گواچ گیا ہے۔ اسیں رب نال سانگا رکھن لئی بنائے گئے سی۔ اپنے پاپ دے پاروں، اسیں اوس سانگے نالوں نکھڑ گئے۔ ایہدے توں وی مندا، ساڈا پاپ سانوں سدا ای رب نالوں نکھڑے رہن دا سبب بنے گا، ایس حیاتی وچ وی تے اگلی حیاتی وچ وی (رومیوں باب 6 آیت 23؛ یوحنا باب 3 آیت 36)۔
ایہہ گنجھل کیویں کھل سکدی ہے؟ یسوع راہ ہے! یسوع نے ساڈا پاپ اپنے سر لے لیا (2 کرنتیھوں باب 5 آیت 21)۔ یسوع ساڈی تھاں مویا (رومیوں باب 5 آیت 8)، اوہ سزا اپنے سر لیندیاں جیہدے حقدار اسیں سی۔ تن دیہاڑیاں مگروں، یسوع مردیاں وچوں جی اُٹھیا، پاپ اتے موت تے اپنی جت نوں ثابت کردیاں (رومیوں باب 6 آیت 4 تے 5)۔ اوہنے ایہہ کیوں کیتا؟ یسوع ایس سوال دا جواب آپ دیندا ہے: "ایس توں وڈا پیار کوئی ہور ہو ہی نہیں سکدا بئی بندہ اپنی جان اپنے سجناں توں وار دیوے" (یوحنا باب 15 آیت 13)۔ یسوع مریا تاں جے اسیں جی سکیئے۔ جے اسیں یسوع تے ایمان رکھدے ہاں، ایہہ بھروسہ کردیاں بئی اوہدی موت ساڈے پاپاں دا کفارہ ہے، ساڈے سارے پاپ بخشے اتے دھوتے جاندے ہین۔ فیر ساڈی روح دی بھکھ مٹ جاوے گی۔ بتیاں بل پین گیاں۔ حیاتی نوں پورا کرن تیکر ساڈی پہنچ ہو جاوے گی۔ اسیں اپنے سچے گُوڑھے سجن اتے چنگے چروال نوں جان جاواں گے۔ سانوں پتہ لگ جاوے گا بئی مرن توں مگروں وی جیواں گے – مرن توں مگروں جی اُٹھن والی حیاتی بہشتاں وچ یسوع دے سنگ سدا لئی!
"كيونجے رب نے جہان نال اجیہی محبت ركھی بئی اوہنے اپنا اکو اک پتر بخش دتا تاں جے جیہڑا اوہدے تے ایمان ركھے مرے نه سگوں ہمیش دی حیاتی پاوے" ﴿يوحنا باب 3 آیت 16﴾۔
جو کجھ تسیں ایتھے پڑھیا ہے اوہدے پاروں کیہ تسیں مسیح لئی کوئی فیصلہ کر لیا ہے؟ جے انج ہے، مہربانی کرکے ہیٹھاں "میں اج مسیح نوں قبول کیتا" دے بٹن تے کلک کرو۔
English
مکتی دا چارا / مکتی دا طریقہ کیہ ہے؟
