Kibii:
Lakricitayo obedo ngo?
Lubo:
Lagony telok tito ni Lakricitayo twero bedo cal ki “ngat ma tucu niyene ikom Yecu ni en aye Kricito onyo tye i dini ma ocung ikom pwony pa Yecu.” Kadi man tye acaki maber me gonyo telok man, macalo nonge i lagony telok mukeneni ducu, ento pe ogonyo telok ikit ma miteni kikome ma tito anga ma obedo lakricitayo. Nyiglok ni “Lakricito” kitiyo kwede tyen adek i Cik Manyen (Tic pa Lukwena 11:26; 26:28; 1 Petero 4:16). Nying lupwonye pa Kricito kikwongo lwongo ni “Jo pa Kricito” ki i Antioka (Tic pa Lukwena 11:26) pi yo me kwogi, ticgi, wa ki lokgi onongo calo pa Kricito. Nyiglok ni “Lakricito” tere ni, jo me adwol pa “Kricito” onyo ni “lalub Kricito.”
Ki gum marac ka kare okato, nyiglok ni “Jo pa Kricito onyo Lakricito” pe dong rom ki telok mayam con ca omiyo dong kilwongo ki ngat ma ladini onyo ma yo me kwone tye atir kadi ka pe ye dok pe lubu Yecu Kricito. Pol jo ma gimaro cito i gang lega i kanica kadi ka pe guketo niyegi ikom yecu giwaco ni gin lukricito onyo ni gin gikwo i lobo ma ye “Kricito.” Ento cito i kanica, miyo kony bot jo ma piny obwoyogi, onyo bedo dano ma kite ber pe loki idoko lakricito. Cito i kanica pe miyo idoko lakricito iyo acel ma cito i garege pe miyo idoko mutoka. Bedo lamema me kanica, wa ki cito i gang lega kare ki kare, miyo lim i kanica bene pe weko i doko lakricitayo.
Baibul pwonyo ni tic mabeco ma watiyoni pe twero miyo Lubanga jolowa. Tito 3:5 waco ni, “En olarowa woko cut, pe pi tic ma wan watiyo ikit ma atir, ento pi kicane gire. Olarowa ki pii ma olwokowa me nywalle tyen me aryo ki me doko jo manyen pi Cwiny Maleng.” Piman, lakricitayo aye ngat ma kinywalo tyen me aryo ma Lubanga aye onywalo (Jon 3:3; Jon 3:7; 1 Petero 1:23) dok oketo niyene ki gen ma mere ikom Yecu Kricito. Jo Epeco 2:8 waco botwa ni “…pien pi kica omiyo en olarowu, pi niye—man pe otime pi tic mo ma wun wutiyo; meno obedo mot pa Lubanga gire.”
Lakricitayo me ada aye obedo ngat ma oketo niyene ki gen ma mere ikom gin ma Yecu otiyo kacel ki to mere ikom yatariya macalo cul pi bal ma mere ci ocer woko ki ikin jo muto inino me adeke. Jon 1:12 waco ni, “Ento dano ducu ma ceng gujole, ma guye nyinge, omiyogi twero me doko lutino pa Lubanga.” Alama me ada ma nyutu lakricitayo me ada aye maro jo mukene ki lubu lok pa Lubanga (1 Jon 2:4, 10). Lakricitayo me ada en aye latin pa Lubanga, ma iot pa Lubanga, dok nongo obedo ngat ma kimiyo kwo manyen i Yecu Kricito.
English
Itye ki lapeny mo?