Ubusansa:
Bushe Yesu ninaani?
Imfwa:
Ukupusanako neelipusho ilyakweba ati “Bushe Lesa eko aaba?”, lelo iliipusho ilyakwipusha pali Yesu Kristu nga eko aali, banoono abantu abepusha. Abengi basuminafye ati caciine Yesu aali umuntu uwaleikala kale kucaalo ca Israeli imyaka iyapita 2,000. Ukulandauka kwambila pakuba kwakwe Yesu Kristu koonse. IfyabuLesa ifikalamba fyoonse fifunda ati Yesu aali nikasesema, nangula ati nikafundisha umusuma, nangula ati muuntu uwaapetamina Lesa. Lelo Baibele itweba ati Yesu aali wamuyayaya uwacila kasesema, uwacila kafundisha, elyo aali uwacila umuntu uwaapetamina Lesa.
C. S. Lewis mucitabo cakwe iceeshina ati Mere Christianity, aalembamo ati: “Kuno nde eshako ukukanya cila muntu ukulanda icintu icishili camaano ico abantu balanda ilingi pali wene [Yesu Kristu]: ati, ‘Ine niinjimpekanya ukusumina ati Yesu aali kafundisha uwamibeele isuma mumutima, lelo nshilesumina ifyo aalanda ati niLesa.’ Ici eecintu cimo ico tatwalinga ukulanda. Umuntu uwalifye umuntu, nookulanda ifintu ifyo Yesu alaandile, teti abefye kafundisha uwamibeele isuma mumutima. Aalinga ukuba uwapena—pamo noomuntu uwingayeba umwine ati ena liini lyakwipika—nangu nga teifyo, ninshi niCiwa ica mumulilo uwape. Iwe walinga ukusala. Nangula ati uyu muntu aali niMwana Lesa, elyo nanoomba aaba niMwana Lesa, nangu aali umuntu uwapena, nangula aali fimbifye ifibi saana. Kuti wayeebafye wemwine ati aali iciwelewele, nangu kuti wamufwishila amate nookumwipaya ati pantu muupashi uwakowela; nangu kuti waiposa kumakasa yakwe nookumulumbula ati niMfumu, ati niLesa. Lelo twilalanda ifyabupuba ati aali umuntufye uwali kafundisha mukalamba. Taatuleka fye tusale ifyabupuba. Tefyo aafwaile” (Macmillan, 1952, p. 55–56).
Nomba kanshi, Yesu alandile ati aaba naani? Nga Baibele yalanda ati ninaani? Icakwambilapo, niLesa mubuntu. Yesu alandile muli Yoani 10:30 ati, “Tata na ine twabafye umo.” Pakuloleshafye aya amashiwi bwangu, kuti wamona kwati taleilumbula ati niLesa. Nomba mona ifyo abena Yuda bacitile pakumfwa fintu aalandile. Baliesha ukumulasa amabwe ati “pa musaalula obe kuli Lesa. Pantu iwe we muntufye niwe uleitunga ukuba Lesa” (Yoani 10 :33). Nomba abena Yuda chaliibalondolokela fintu Yesu aalandile ifyakuilumbula ati niLesa. Mumashiwi ayakonkelepo, Yesu taakalipiile abena Yuda, nangu ukulondalolapo fintu aalandile. Taebele ati, “Nshilandilepo ati nine Lesa.” Lintu Yesu aalandile ati, “Tata na ine twabafye umo” (Yoani 10:30), aalandile icishinka ati aalilingana naLesa.
Muli Yoani 10:58, Yesu aalandile ati eko aali lintu fyoonse tafilaabako, filya fine aaba Lesa, pakweba ati: “Ndemweba icine cine Abrahamu talati abeko, ninshi ine eko naba.” Pakwasuka aya amashiwi, abena Yuda balitoola amabwe nakaambi ati balase Yesu (Yoani 8:59). Pakulanda ati eko aali lintu fyoonse tafilabako, Yesu aabomfeshe ishina lyakwe Lesa pakuilumbula ati—UWABAPO (Ukufuma 3:14). Abena Yuda balikaana ifyo Yesu ailumbwile ati niLesa uwafyelwe mubuntu, lelo ifyo aleelanda fyaliibalondolokela bwino.
Napambi muli Baibele apakwishibila ati Yesu niLesa mubuntu, paluunda Yoani 1:1, uko balaanda ati, “Lishiwi ali ni Lesa,” pamo na Yoani 1:14 uko balaanda ati, “Lishiwi aishile aluka umuntu. Lintu Toma umusambi umo uwakwe Yesu aebele ati, “We Mfumu yandi, we Lesa wandi!” (Yoani 20:28), Yesu tamukalipiile. Umusole Paulo aalondolola Yesu ati “Lesa Mukulu kabili Umupusushi wesu Kristu Yesu (Tito 2:13). Umusole Petelo nao aalanda cimo ciine pakulumbula Yesu ati, “Lesa wesu kabili Umupusushi wesu Yesu Kristu” (2 Petelo 1:1).
Lesa tata nao alapeela ubumbone pakuba kwakwe Yesu ati “Lelo pali Mwane pena, Lesa atila ati, ‘Icipuna cobe icabufumu, we Lesa, cabelelela pe na pe! Ne nkonto ya bufumu bobe ni nkonto yamulinganya’” (Bahibulu 1:8; mona ku Amalumbo 45:6). Ukusesema kwamuCipingo caKale kumashiwi yakwe Esaya 9:6 eko baabilisha buLesa bwakwe Kristu ati: “Pantu kuli ifwe nakufyalwa umwana. Ifwe natupeelwa umwana umwaume. Ifwe eukalatuteeka. Bakalamwita abati, Kabilo uwacipeshamano, Lesa Wamaka, Shifwe Wape, Cilolo wamutende (twalundapo ukukoselesha amashiwi).
Ninshi ilipusho lyakuba kwakwe Kristu lyabela ilikankala? Mulandunshi calinga Yesu ukuba niLesa? Ukulondolola kwaaba ukwingi:
• Nga filya aalondolwele C. S. Lewis, ati nga Yesu te Lesa, ninshi Yesu muntu uwabufi saana, elyo talinga ukumucetekela nakalya.
• Nga Yesu te Lesa, ninshi abasole nabo baali ababufi.
• Yesu aalinga ukuba niLesa pantu lintu balaile ati kukaba Meshiya, baebele ati akaba “Uwamushilo” (Amalumbo 16:5, NASB). Pakuba pesonde tapaaba uwaololoka kucinso cakwe Lesa (Amalumbo 53:1; 143:2), eekweba ati niLesafye umwine eewalingile ukwisa pesonde mubuntu.
• Nga Yesu te Lesa, ninshi imfwa yakwe nga tayafikilishe ukulipila umulandu wammembu shabena caalo (1 Yoani 2:2). NiLesafye umwine eewingatuula ilambo ilyamuyayaya, ilyamutengo (Roma 5:8; 2 Kolinti 5:21).
• Lesa ekafye eeMupusushi (Hosea 13:4; cf. 1 Timote 2:3). Pakutila ati Yesu engalinga ukuba Umupusushi, ninshi niLesa.
Yesu aalingile ukuba niLesa pamo nookuba umuntu. Pakuba niLesa, epo Yesu aafikiliishe ubukali bwakwe Lesa. Pakuba niLesa uku nako muntu, epo Yesu aali Uwakuwikishanya
uwapwililika pakati kamulu nesonde (1 Timote 2:5). Ubupusukilo bwaabakofye pakucetekela Yesu Kristu. Nga filya aalandile ati, “Nine nshila, nine cishinka, nine mweo. Teti kube nangu umo uwingesa kuli Tata, kano apita kuli ine” (Yoani 14:6)
English
Bushe namukwatako ameepusho?