Ubusansa:
Nga Umwina Kristu niciinshi?
Imfwa:
Mucitabo icilanga umwalondolokela amashiwi, balondololamo ati Umwina Kristu aapalako “umuntu uwasumina ukucetekela Yesu Kristu, nangula ubwina Lesa ubufunda ifyakwe Yesu.” Nangula apa paasuma ukwambilapo, nga filya ifitabo fyamusango uyu filondolola, lelo tafyafikilisha mukulondolola kwaciine icamuli Baibele, ukulingana neefyo Umwina Kristu aaba. Ishiwi ati “Umwina Kristu” lyabamo imiku itatu muCipingo Cipya (Imilimo 11:26; 26:28; 1 Petelo 4:16). Abasambi bakwe Yesu ebo baambile abantu ukwita ati “Abena Kristu” kumusumba wa Antioki (Imilimo 11:26) pamulandu wamibeele yaabo, neemicitile yaabo, neemilandile kwati ni Kristu. Ishiwi ati “Umwina Kristu” lyalondolola ati “uwaaba kucipani chakwe Kristu” nangula “umusambi wakwe Kristu.”
Nomba caaba icabulanda ifi kwaapita inshita iitali, epo ishiwi ati “Umwina Kristu” lyaalufya ukulondoloka kwaliko, elyo liboomfishiwa pakulumbula cila umuntu uwapendamina kufyabuLesa, nangula uwamibeele isuma mumitima, uushaaba umusambi uwaciine uwakwe Kristu. Abantu abengi abashasumina nookucetekela Yesu Kristu, baimona abeene ati Beena Kristu pantufye balalongana kulukuta, nangu pantu beekala mucaalo ico beeta ati “Icaalo cabwina Kristu.” Lelo ukulongana kulukuta, nangula ukuboombela abantu abashanoonka ngaiwe, nangula ukuba umuntu umusuma mumicitile, teti fikupange ube Umwina Kristu. Ukulaaya kukulongana kulukuta teti cikupange Umwina Kristu, ngafilya teti ube niwe motoka pantu ulaya ku garage. Ukuba umo naabalongana mulukuta, nookulaalongana lyoonse, nookulapeela ifyakwafwilishako imilimo iyalukuta, teti fikupanga ube Umwina Kristu.
Baibele ifunda ati imilimo isuma iyo tuboomba, teti ilenge Lesa atupokelele. Tito 3:5 yalaanda ati, “Tatupuswishe ico ifwe fwe bene twacitile ifintu fimo ifisuma, lelo ni pa mulandu wa luse lwakwefye. Pantu atupuswishe ilyo Mupashi Wamushilo atusambile pakuti tufyalwe cipya cipya, nokutulenga ukuba no mweo upya.” Kanshi, Umwina Kristu aaba umuntu uwafyalwa icaabubili kuli Lesa (Yoani 3:3; Yoani 3:7; 1 Petelo 1:23) elyo aaba uwacicetekelo nookucetekela Yesu Kristu. Efeso 2:8 yalaanda ati, Pantu ni ku cikuuku cakwa Lesa, ico mwasumina, eko mwapusukila. Ici cena bupefye bwakwa Lesa.”
Umwina Kristu uwaciine aaba umuntu uwacicetekelo nookucetekala Yesu Kristu neemilimo aabomba, ukubikilako neemfwa yakwe pacapindama, ukuba ilipilo pamembu shesu, nookusanguka kwakwe pabushiku bwabutatu. Yoani 1:12 atweba ati, “Lelo bonse abamupokelela, bamusumina no kumusumina, ena abapeela amaka yakuba abana bakwa Lesa.” Apakwishibila Umwina Kristu waciine, nipaciitemwiko aakwata pabanankwe, napaunakila Ishiwi lyakwe Lesa (1 John 2:4, 10). Umwina Kristu waciine aaba umwana wakwe Lesa, aaba wamulukuta ulwaciine ulwakwe Lesa, elyo aaba umo uo baapela umweo uupya muli Yesu Kristu.
English
Bushe namukwatako ameepusho?