Hèsin:
Un ko ɖi nǔ nú Jezu…din ɔ étɛ́ wɛ kpo?
Ɖò:
É na cɛ nú we! A sɔ́ gbeta e húzú gbɛ towe é! A sixú ko ɖo kinkanbyɔ́ hwiɖée wɛ ɖɔ, “Din ɔ́ étɛ́ wɛ kpo a jí? Nɛ̌ un ka sixú jɛ yiyi xá Mawu jí gbɔn? Afɔɖiɖe atɔ́ɔ́n e bɔdéwú lɛ́ ná ná we alixlɛ́mɛ Biblu tɔn lɛ́. Ényí a ɖó nǔkanbyɔ́ lɛ́ dó lěe a na yì xá Mawu gbɔn é jí hǔn, kɛnklɛ́n bo yi tɛn élɔ́ www.GotQuestions.org jí.
1. Mɔnǔjɛwú ɖɔ émí mɔ nukúnnú jɛ hwlɛngán émitɔn mɛ.
1 Jaan 5:13 ɖɔ nú mǐ ɖɔ “Un ɖo nǔ énɛ́ wlán sɛ́ dó mi wɛ bónú mi mɛ e ɖi nǔ nú Mawu ví ɔ́ lɛ́ɛ ná tunwun ɖɔ émí ɖó gbɛ mavɔ mavɔ.” Mawu ba ɖɔ a ní mɔ nukúnnújɛ hwlɛngán towe mɛ. Mawu ba ɖɔ mǐ ní kúdéjí ɖɔ mǐ ko nyí hwinhwlɛ́ngán nǔgbó nǔgbó. Ɖo kléun mɛ ɔ, mi nú mǐ ní gbɔn nǔ tají é nɔ zɔ́n bɔ è nɔ mɔ hwlɛ́ngán lɛ́ é jí.
(a) Mǐ mɛ bǐ wɛ hu hwɛ. Mǐ mɛ bǐ wɛ nɔ wa nǔ e ma nɔ nyɔ́ Mawu nukún mɛ ǎ lɛ́ é (Hlɔ̌manu lɛ́ 3:23).
(b) Ɖó mǐ nyí hwɛhutɔ́ wú ɔ́, tódɔnnúmɛ e mǐ jɛxá wɛ nyí kínklán mavɔ mavɔ xá Mawu (Hlɔ̌manu lɛ́ 6:23).
(c) Jezu kú ɖo aklúzu jí bó ná dó sú hwɛxɔ́ mǐtɔn lɛ́ (Hlɔ̌manu lɛ́ 5:8; 2 Kɔlɛ́ntinu lɛ́ 5:21). Jezu kú dó tɛn mǐtɔn mɛ, bo bɛ́ tódɔnnúmɛ e mǐ jɛxá lɛ́. Fɔ́nsínkú Jezu tɔn xlɛ́ ɖɔ kú tɔn ko kpé bo na sú hwɛxó mǐtɔn lɛ́.
(d) Mɛ e ɖi nǔ nú Jezu lɛ́ ɔ́,Mawu nɔ sɔ́ hwɛ kɛ yě bo nɔ ná gbɛ mavɔ mavɔ yě – mɛ ɖeji ɖɔ kú Tɔn wɛ sú hwɛxɔ́ mǐtɔn lɛ́ é. (Jaan 3:16; Hlɔ̌manu lɛ́ 5:1; Hlɔ̌manu lɛ́ 8:1).
Wɛn hwlɛngán tɔn ɖie! Ényí mǐ ɖó nǔɖiɖi ɖɔ Jezu klisu wɛ Hwlɛngántɔ́ mǐtɔn ɔ́, è ná hlwɛ́n mǐ gán! É sɔ́ hwɛ towe lɛ́ bǐ kɛ we, bɔ Mawu d'akpá ɖɔ Émí kún na jo we dó alǒ ɖe alɔ sín kan towe mɛ gbeɖé ó (Hlɔ̌manu lɛ́ 8:38-39; Matíe 28:20) Ma wɔn ó, hwlɛ́ngán towe ɔ, Jezu Klisu wɛ nyí gǎnjɛ́wú tɔn. Ényí mi nɔ ɖeji dó Jezu kɛ́ɖɛ́ wú ɖɔ É wɛ nyí Mɛhwlɛngántɔ́ towe ɔ, mi sixú ɖó gǎnjɛ́wú ɖɔ mi na nɔ kpɔ́ xá Mawu kákásɔ́yi ɖo sɛ́xwé!
2. Ba sinsɛn ɖagbe e nɔ kplɔ́n Biblu mɛ é ɖé.
Sinsɛn xó e ɖɔ wɛ mǐ ɖe ɖo fí e nyí sinsɛn xɔ ǎ. Gbɛtɔ́ lɛ́ xó ɖɔ wɛ mǐ ɖe. É ɖo tají tawun ɖɔ mɛ ɖěɖěe ɖi nǔ nú Jezu Klisu lɛ́ ní nɔ wa nǔ dókpɔ́ nɔví nɔví ɖɔhun. Hwɛjijɔ tají ɖokpó é wú sinsɛn dó tíin é nɛ́. Din e a ko ɖi nǔ Jezu Klisu e ɔ́, mǐ ɖo wǔsyɛ́n dó lanmɛ nú we vɛ́návɛ́ná wɛ ɖɔ a ní ba sinsɛn e nɔ sɔ́ nǔɖiɖi tɔn jinjɔ́n Biblu jí é ɖé bo ɖɔ xó xá lɛ̌ngbɔ́nyitɔ́ ɔ́. Tɛnkpɔ́n bónú é nì tunwun ɖɔ yɔ̌yɔ́ wɛ a ɖi nǔ nú Jezu Klísu.
Nǔ wegɔ́ e wú sinsɛn dó tíin ná e wɛ nyí ɖɔ ní nɔ kplɔ́n Biblu mɛ. A sixú kplɔ́n lěe e ná nɔ zán alixlɛ́mɛ Mawu tɔn lɛ́ ɖo gbɛzán towe mɛ gbɔn e. Nukúnnú mimɔ jɛ Biblu mɛ nyí nǔ tají e na zɔ́n bɔ klisánwun gbɛzinzán mɛtɔn na kpa mɛ bo ɖó hlɔ̌nhlɔ́n é. 2 Timɔtée 3:16-17 ɖɔ, “Nǔ e è wlán dó Mawuxówéma ɔ́ mɛ ɔ́, Mawu wɛ sɔ́ bǐ dó ayi mɛ nú mɛ lɛ́ɛ; é nyɔ́ nú è nǎ sɔ́ dó kplɔ́n nǔ mɛ, bó ná dó ɖe mɛ dó ali jí, bó ná dó ɖe nǔwanyido lɛ́ɛ xlɛ́, lobo ná dó kplɔ́n lě e è nǎ zǎn gbɛ ɖagbe gbɔn ɔ́ mɛ, bónú mɛ e nyí Mawu tɔn ɔ́ ná ɖo gbesisɔ mɛ titewungbe, bɔ nǔ e é ná dó wa nǔ ɖagbe bǐ na ɔ́ bǐ ná ɖo así tɔn.”
Nǔ atɔngɔ́ é wú sinsɛn dó tíin wɛ nyí sinsɛn bíbló. Sinsɛn bibló ɔ, kúdìdó nú Mawu nú nǔ e é wa nú mǐ lɛ́ wɛ! Mawu ko hwlɛ́n mǐ. Mawu yí wǎn nú mǐ. Mawu nɔ kpé nukún dó mǐ wú. Mawu nɔ xlɛ́ ali mǐ? Nɛ̌ mǐ ka sixú dókú ní gbɔn? Mawu nyí mɛ mímɛ́, nǔjlɔ́jlɔ́watɔ́, wǎnyíyínɔ, xomɛnyɔ́tɔ́ kpó fɛ́nú ɖaxó nɔ kpó. Nǔɖéxlɛ́mɛ 4:11 ɖɔ, “Aklúnɔ mǐtɔn, Mawu mǐtɔn,
susu, yɛ̌yi kpó hlɔ̌nhlɔ́n kpó jɛ xá we, ɖó a blǒ nǔ bǐ; hwi wɛ jló bɔ yě tíin; hwi wɛ jló bɔ yě ɖo gbɛ.”
3. Nɔ ɖe hwenu dó vo bo nɔ sɔ́ ayi dó Mawu jí gbe bǐ gbe.
É ɖo tají tawun ɖɔ mǐ ní nɔ zán hwenu bo nɔ sɔ́ ayi dó Mawu jí gbe bǐ gbe. Mɛɖé lɛ́ nɔ ylɔ́ ɖɔ “hwenu xwíi ninɔ tɔn.” Mɛɖěvo nɔ ylɔ́ ɖɔ “mɛɖée zizéjó,” ɖó hwenɛ́nu wɛ mǐ nɔ sɔ́ mǐɖée jo nú Mawu. Mɛɖé lɛ́ nɔ ɖe hwenu dó vo ɖo zǎnzǎn lɛ́, mɛɖěvo lɛ́ nɔ ba gbadanu lɛ́. Lěe mǐ nɔ ylɔ́ hwenu énɛ́ ɖɔ alǒ hwe ɖěbǔ e mǐ nɔ wa mɔ̌ wɛ nyí nǔ tají ɔ́ ǎ. Nǔ tají ɔ wɛ nyí hwenu e a nɔ zán xá Mawu hwɛhwɛ é. Nǔ tɛ́ lɛ́ mǐ ka na nɔ wa ɖo hwe énɛ́ nu?
(a) Ɖɛxixo. Dɛxixɔ ɔ xóɖiɖɔ xá Mawu wɛ. A na nɔ ɖɔ nǔ e nɔ ɖu ayi mɛ nú we lɛ́ kpó tagba towe lɛ́ kpó nú Mawu. Nɔ by Mawu ɖɔ é ní ná we nǔnywɛ́ bo nɔ xlɛ́ ali we. Nɔ byɔ́ Mawu ɖɔ é ní sú hudo towe lɛ́. Nɔ ɖɔ lěe do a yí wǎn nú Mawu sɔ é kpó lěe nǔ e É nɔ wa lɛ́ nɔ nukún towe mɛ sɔ é kpó. Nǔ e ɖɛ tíin ná énɛ́.
(b) Biblu xixa. Gbɔnvo nú Biblu e è nɔ kplɔ́n mɛ ɖo agun mɛ, ɖo Wěmaxɔmɛ Aklúnɔzángbe tɔn hwenu ɔ, kpó Biblu kplɔ́nkplɔ́n kpó ɔ́ - é ɖo dandan ɖɔ hwiɖésunɔ mɛtún ní nɔ xa Biblu. Nǔ e a ɖó ná tuun bɔ Klisánwun gbɛzínzán towe na kpa we lɛ́ bǐ wɛ ɖo Biblu mɛ. Alixlɛ́mɛ Mawu tɔn dó lěe e è ná wá gbeta e nǔnywɛ́ kpé lɛ́ e kɔn gbɔn, lěe e na tuun jlǒ Mawu tɔn gbɔn, lěe è ná wa sinsɛnzɔ́ nú mɛɖěvo lɛ́ gbɔn kpó lěe è na su ɖo gbigbɔ lixo kpó gbɔn é wɛ ɖ'émɛ. Biblu ɔ xó Mawu tɔn nú mǐ wɛ. Tají ɔ́ alixlɛ́mɛ wéma dó lěe mǐ na zán gbɛ mǐtɔn gbɔn bɔ é na víví nú n'Í bo jɛmɛ nú mǐ é wɛ Biblu nyí.
4. Zun xɔ́ntɔn xá mɛ sixú d'alɔ we ɖo gbigbɔ lixo lɛ́.
1 Kɔlɛ́ntinu lɛ́ 15:33 ɖɔ nú mǐ ɖɔ, “Mi ma blɛ́ miɖée ó: “Gbɛ̌ nyanya lɛ́ɛ ɔ́, walɔ ɖagbe e è ɖǒ ɔ́ wɛ yě nɔ hɛn gblé.” Akpágbanúmɛ dó nǔ e gbɛtɔ́ nyanya lɛ́ sixú wa dó mǐ wú é wɛ ɖo Biblu mɛ. Hwenu zínzán xá mɛ ɖěɖěe nɔ d'alɔ ɖo hwɛhuhu nǔwalɔ lɛ́ mɛ ná sísɛ́ mǐ bɔ hwɛhuhu nǔwalɔ énɛ́ lɛ́ na jɛ mǐ tɛ́nkpɔ́n jí. Jijɔ mɛ e ɖo kpɔ́ xá mǐ lɛ́ tɔn ná va dó mǐ wú. Énɛ wú wɛ é ɖo tají ɖɔ mɛ ɖěɖěe yí wǎn nú Aklúnɔ ɔ, bo nɔ tɛdó wǔ Tɔn lɛ́ wɛ mǐ ná nɔ dó gbɛ xá.
Tɛ́nkpɔ́n bo ba xɔ́ntɔn ɖokpó alǒ we, ée na d'alɔ we bo dó wǔsyɛn lanmɛ nú we é, yě sixú gosín agun towe mɛ (Eblée 3:13; 10:24). Byɔ́ xɔ́ntɔn towe lɛ́ ɖɔ yě ní d'alɔ we nú a ní ylɔ́ hwenu xwíi ninɔ tɔn towe wú, nǔwiwa towe lɛ́ kpó yi e yi xá Mawu wɛ a ɖe e ɖɔ nǔjɔnǔ. Kanbyɔ́ yě ɖɔ émí lɔ sixú wa nǔ ɖokpó ɔ nú yě a jí. Énɛ́ ka ɖo xlɛ́xlɛ́ wɛ ɖɔ na jǒ xɔ́ntɔn towe ɖěe ma tuun Aklúnɔ mǐtɔn ɖi Mɛhwlɛngantɔ́ yětɔn dó ǎ. Kpo ɖo xɔ́ntɔn yětɔn nyí wɛ bo kpo ɖo wǎn yí nú yě wɛ. Tɛnkpɔ́n bónú yě ní tuun kpowun ɖɔ Jezu húzú gbɛ towe bɔ émí kún sixú sɔ́ wa nǔ ɖěɖěe émí nɔ wa ɖ'ayǐ lɛ́ ó. Byɔ́ Mawu ɖɔ É hun ali nú we bónú a ná ɖɔ xó dó Jezu wú xá xɔ́ntɔn towe lɛ́.
5. Blǒ batɛ́mu.
Mɛ gěgé ɖó nukúnnú mɔ jɛ nǔ mɛ ɖokpó ɔ́ dó batɛ́mu wú ǎ. Xókwín batɛ́mu sín tínmɛ wɛ nyí “è ní nylɔ́ dó sin mɛ.” Sɔgbe xá Biblu ɔ, batɛ́mu nyí nǔɖiɖi yɔ̌yɔ́ e è ɖó ɖo Klisu jlájlá ɖo agbawungba kpó gbeta sísɔ́ b'a xwed'É kpó. Zǐn e è nɔ zín mɛ dó sin mɛ é xlɛ́ ɖɔ è ɖi mɛ kpó Klisu kpó. Tíntɔ́n sín glɔ́ nɔtenú fínfɔ́n sín kú Jezu tɔn. Batɛ́mu blóbló nyí mɛɖé dídó gésí ɖo kú, ɖiɖi, kpó fínfɔ́n sín kú kpó Klisu tɔn kpó mɛ (Hlɔ̌manu lɛ́ 6:3-4).
Batɛ́mu nyí nǔ e hwlɛ́n mǐ gán é ǎ. Batɛ́mu nɔ súnsún hwɛ mɛtɔn lɛ́ sín kɔ nú mɛ ǎ. Batɛ́mu ɔ tónúsise sín afɔɖiɖe wɛ, jlájlá ɖo agbawungba ɖɔ nǔɖiɖi ɖíɖó nú Klísu kɛ́ɖɛ́ wɛ nɔ hwlɛ́n mɛ gán. Batɛ́mu ɖo tají ɖó afɔɖiɖe tónúsise tɔn wɛ – énɛ́ wɛ nyí nǔɖiɖi ɖiɖexlɛ́ agbawungba ɖo Klisu mɛ kpó mɛɖée sísɔ́ dó alɔ mɛ n'Í kpó. Ényí a ɖo gbesisɔmɛ bo ná bló batɛ́mu hǔn yi ɖɔ nú lɛ̌ngbɔ́nytɔ́ ɖé.
English
A ɖó nǔkanbyɔ́ ɖé a?