Soal:
Aku udah ngengkahka pengarap aku ba Jesus, nama patut digaga aku diatu?
Jawapan:
Tahniah! Nuan udah meri pemutus ti nukar pengidup! Engka nuan nanya, “Nama diatu? Bakani aku deka ngepun ka pejalai aku enggau Tuhan?” Bisi lima iti chara dipadah ba baruh tu meri nuan arah ari Bup Kudus. Enti nuan bisi saut ba pejalai nuan, tau lawa ba www.GotQuestions.org.
1. Pasti ka nuan mereti pasal pengelepas.
1 John 5:13 madahka kitai, “Aku nuliska tu ngagai kita ke arapka nama Anak Allah Taala, ngambika kita nemu diri bisi pengidup ti meruan belama iya”. Tuhan deka kitai meretika pasal pengelepas. Tuhan deka kitai bisi tetap ati nemu kitai udah diselamatka. Enggau jaku pandak, aram kitai meda poin ti penting selentang pengelepas:
(a) Kitai semua udah bedosa. Kitai semua udah ngereja nama ti enda nyenangka Tuhan (Rome 3:23)
(b) Ketegal dosa kitai, kitai patut diukum enggau diselara ka belama ia ari Tuhan (Rome 6:23)
(c) Jesus mati ba kayu regang mayar ukum dosa kitai (Rome 5:8, 2 Korint 5:21). Jesus mati ba tempat kitai, ngambi ukum ti patut diterima kitai. Pengangkat Iya beri bukti pemati Jesus cukup kena mayar dosa kitai.
(d) Tuhan meri pengampin enggau pengelepas ngagai semua orang ti udah ngengkah pengarap sida ba dalam Jesus — arapka pemati Iya nyadika bayar ngagai dosa kitai (John 3:16; Rome 5:1; Rome 8:1)
Nya meh pesan pasal pengelepas! Enti nuan ngengkahka pengarap nuan dalam Jesus Kristus nyadika Penyelamat nuan, nuan deka diselamatka! Semua dosa nuan deka diampun. lalu semaya Tuhan enda deka ngelengka enggau ninggalka nuan (Rome 8:38-39; Matthew 28:20). Ingat, pengelepas nuan udah selamat dalam Jesus Kristus (John 10:28-29). Enti nuan pechaya dalam Jesus siku aja nyadika Penyelamat nuan, nuan deka bisi pengeliat ati deka begulai enggau Tuhan ba serga belama ia!
2. Giga gereja ti manah ti ngajar pasal Bup Kudus.
Anang nuan ingat gereja nya semina bangunan. Gereja ianya bala kitai mensia. Amai penting orang ti arap dalam Jesus Kristus bekaul enggau pangan diri. Nya meh siti ari tuju gereja. Diatu nuan udah ngengkahka pengarap nuan dalam Jesus Kristus, kitai deka meransang nuan ngiga gereja ti arapka Bup Kudus ba menua nuan lalu bejaku enggau pastor sida. Padah ngagai ia pasal pengarap nuan ti baru dalam Jesus Kristus.
Tuju kedua gereja ianya ngajar Bup Kudus. Nuan deka belajar bakani deka meri ngereja ajar Tuhan dalam pengidup nuan. Mereti ka Bup Kudus nya kunci ka pengidup ti mujur enggau pengidup Kristian ti kering. 2 Timoti 3:16-17 madah “Semua Bup Kudus endang bepun ari Allah Taala magang, lalu beguna kena ngajar, kena ngerara, kena ngaduka utai ti salah, enggau kena matihka orang diau lurus, ngambika semua nembiak Allah Taala chukup disikap ngereja genap macham pengawa ti badas.”
Tuju ketiga gereja ianya sembah. Sembah ianya meri terima kasih ngagai Tuhan ba semua utai ti udah dikereja Iya! Tuhan udah nyelamatka kitai. Tuhan rinduka kitai. Tuhan nyediaka kitai. Tuhan ngiring enggau meri arah tuju ka kitai. Bakani kitai tau enda beterima kasih ngagai Iya? Tuhan nya kudus, lurus, rindu, sinu serta penuh enggau pengasih. Pemandan 4:11 madah, “O Tuhan Allah Taala kami, Nuan endang patut nerima mulia, basa enggau kuasa, laban Nuan udah ngaga semua utai, lalu ulih peneka Nuan, sida ditempa, lalu diberi pengidup.”
3. Beri awak setiap ari fokus ngagai Tuhan.
Amai penting ba kitai awakka ulih meri awak setiap ari fokus ngagai Tuhan. Sekeda orang nyebut tu ianya “awak sunyi.” Sekeda orang nyebut tu “devosi,” laban nya awak ti lebuh kitai meri diri ngagai Tuhan. Sekeda orang milih awak ba maya pagi ari, sekeda ba ngalih ka malam. Tu enda penting bakani nama ka disebut nuan tauka kemaya nuan deka ngereja ia. Nama ti penting ianya nuan ulih meri awak enggau Tuhan. Nama utai ti ulih meri awak kitai enggau Tuhan?
(a) Sampi. Sampi ianya beranda enggau Tuhan. Padahka Tuhan nama pengirau enggau masalah nuan. Minta Tuhan meri nuan penemu enggau ngiring nuan. Minta Tuhan nyediaka nama utai ti diguna nuan. Padahka Tuhan pengerindu nuan ka Iya enggau menghargai nama utai ti udah dikereja Iya ka nuan. Nya meh sampi.
(b) Macha Bup Kudus. Kena nambahka pelajar Bup Kudus ba gereja, Sekula ari Minggu, tauka maya belajar ka Bup Kudus — nuan perlu macha Bup Kudus ka nuan empu. Bup Kudus bisi nyengkaum semua nama ti patut ditemu nuan awakka ulih idup mujur ba pengidup Kristian. Bup Kudus bisi nyengkaum atur iring Tuhan bakani deka ngaga pemutus ti landik, bakani deka mela orang bukai, seta bakani deka betambah dalam pengarap. Bup Kudus nya Jaku Tuhan ka kitai. Bup Kudus nyadika panduan ajar bakani deka idup nyenangka Tuhan enggau ngemuaska Iya.
4. Ngaga kaul enggau orang ti ulih nulung nuan dalam pengarap.
1 Korint 15:33 madahka kitai, “Anang nejuka orang nipu kita: “Orang ke jai ngerusak moral ti menyana.” Bup Kudus ngembuan mayuh pesan jaku tangkan selentang pengaruh orang ti “enda manah” ti ulih nyadi ba kitai. Meri awak begulai enggau orang ti ngereja pengawa ti bedosa ulih ngasuh kitai mega inginka pengawa ti sama. Sifat orang ti ngelingi kitai deka “masuk” ba kitai empu. Nya kebuah amai penting meri kitai dikelingi orang ti rindu ka Tuhan lalu tetap dalam Iya.
Giga kaban siku tauka dua, engka ari gereja nuan, ti ulih nyaup nuan enggau meransang nuan (Hebrew 3:13; 10:24). Minta kaban nuan awakka bisi tanggungjawab ba nuan ba dalam awak sunyi, ba pengawa nuan, enggau dalam pejalai nuan enggau Tuhan. Minta enti nuan mega ulih ngereja nya ka sida. Tu ukai reti ia nuan deka ngelengka semua kaban nuan enti enda ngelala Tuhan Jesus ti nyadi ka Penyelamat sida. Terus nyadi kaban sida lalu rindu ka sida. Kongsi enggau sida Jesus udah ngubah pengidup nuan lalu nuan enda agi ngereja utai ti sama baka suba agi. Minta Tuhan meri nuan peluang bekongsi ka pasal Jesus enggau kaban nuan.
5. Meri diri dibaptisa.
Mayuh orang enda tentu mereti ka pasal baptisa. Leka jaku baptisa maksud ia “diselam ka dalam ai.” Baptisa ianya chara pengarap kita madahka diri ngagai orang mayuh selentang pengarap nuan ti baru dalam Kristus enggau komitmen nuan ti nitihka Iya. Pengawa ti diselam dalam ai nya baka nuan udah dikubur enggau Kristus. Pengawa ti keluar ari ai nya mandangka gambar Jesus ti udah angkat ari pemati. Meri diri dibaptisa ianya meri identiti nuan enggau pemati Jesus, dikubur, enggau angkat baru (Rome 6:3-4).
Baptisa aja enda nyelamatka nuan. Baptisa enda ulih muai dosa nuan. Baptisa ianya singkang nuan ti ngasi, madahka pengarap nuan dalam Kristus siku aja nyadi ka pengelepas. Baptisa tu penting laban nya tanda nuan ngasi - madahka pengarap nuan dalam Kristus enggau komitment nuan ngagai Iya. Enti nuan udah sedia deka dibaptisa, nuan tau madahka pastor nuan.
English
Nuan bisi tanya?