Suraq
Men Isaǵa sendim... endi ne isteýim kerek?
Jaýap
Men Isaǵa sendim... endi ne isteýim kerek?
Biz sizdi quttyqtaimyz! Siz ómirińizdi máńgibaqi ózgertetin sheshim qabyldadyńyz! Bálkim siz ózińizden bylai surap jatqan bolarsyz: «Al endi ne isteýim kerek? Qudaimen birge bolatyn jolymdy qalai bastasam eken?» Kieli kitapta sizge durys baǵyt tańdap alýǵa kómek beretin bes qadam sipattalǵan. Eger osy sayaxat barysynda sizde suraqtar paida bolsa, myna saitqa: https://www.gotquestions.org/Kazakh kirýińizge bolady.
1. Qutqarylýdy durys túsingenińizge tolyq kóz jetkizińiz
Joxannyń 1-xatynyń 5:13-ayatynda bylai aitylǵan: «Sender Qudaidyń rýxani Ulyna sengendikten máńgilik ómirge iesińder. Oǵan senim artqan senderdiń sony bilýleriń úshin bulardy jazyp otyrmyn». Qudai bizdiń qutqarylýdyń ne ekenin túsingenimizdi qalaidy. Qudai bizdiń qutqarylǵanymyzǵa tolyqtai senimdi bolǵanymyzdy tileidi. Qutqarylýdyń basty negizderin qysqasha qaitalap shyǵaiyq:
A) Barlyǵymyz kúnákarmyz. Bárimiz de Qudaiǵa unamaityn laiyqsyz ister jasadyq (Rim. xat 3:23).
Á) Qudaidan máńgilik ajyraý – kúnámyz úshin berilgen jaza bolyp tabylady (Rim. xat 6:23).
B) Isa bizdiń kúnámyzdyń qunyn óteý úshin aiqysh aǵashta Óziniń ómirin qidy (Rim. xat 5:8; Qorynt. 2-xat 5:21). Isa bizdiń tartatyn jazamyzdy Óz moinyna alyp, bizdiń ornymyzda óldi. Al Másixtiń ólimnen qaita tirilýi Onyń óliminiń bizdiń kúnálarymyzdyń qunyn tolyqtai ótegenin dáleldedi.
V) Óz kúnálarynyń Isanyń ólimi arqyly ótelgenine sengen adamdardyń barlyǵyna Qudai keshirim men qutqarylý beredi (Joxan 3:16, Rim. xat 5:1, 8:1).
Qutqarylý degen osy! Eger siz Isa Másixti ózińizdiń Qutqarýshyńyz retinde qabyldap, Oǵan sengen bolsańyz – siz qutqaryldyńyz! Sizdiń barlyq kúnálaryńyz keshirildi, al Qudai sizdi eshqashan da tastamaimyn dep ýáde beredi (Rim. xat 8:38-39, Matai 28:20). Sizdiń qutqarylýyńyz Isa Másix arqyly kepildendirilgenin esińizden shyǵarmańyz (Joxan 10:28-29). Eger siz Isany ózińizdiń Qutqarýshyńyz dep moiyndap, Oǵan senseńiz, onda Qudaimen birge jumaqta máńgilik ómir súretinińizge nyq senimdi bolyńyz!
2. Kieli kitapty talqylap oqityn qaýymdy taýyp alyńyz
Qaýym – ǵimarat emes, qaýym – adamdar. Isa Másixke senetinder úshin basqa senýshilermen qarym-qatynasta bolý óte mańyzdy. Qaýymnyń basty maqsaty osy. Isa Másixke sengennen keiin Kieli kitapty negiz etip ustanatyn qaýymdy taýyp alyp, qaýym jetekshisimen sóilesińiz dep keńes beremiz. Sol jetekshige ózińizdiń Isany jańadan qabyldaǵanyńyzdy aityńyz.
Kieli kitapty zerttep oqý - qaýymnyń ekinshi maqsaty. Siz Qudaidyń nusqaýlaryn óz ómirińizde qoldanýdy úirenesiz. Kieli kitapty túsinýińiz másixshilik ómirińizdiń tabysty bolýyna kómegin tigizedi. Timotege arnalǵan 2-xattyń 3:16-17 ayattary bylai tujyrym jasaidy: «Kieli jazbalardyń bári Qudai Rýxynyń jeteleýimen jazylyp, tálim berý, áshkereleý, túzetý ári ádildikke tárbieleý úshin tiimdi; osylai Qudaidyń adamy barsha igi iske daiyndalyp, tolyqtai dayar bolmaq».
Qaýymnyń úshinshi maqsaty Qudaidy madaqtaý. Madaqtaý arqyly biz Qudaiǵa Onyń jasaǵan barlyq isteri úshin rizashylyq bildiremiz. Qudai bizdi qutqardy. Ol bizdi súiedi jáne bizge qajettiniń barlyǵyn beredi. Ol bizge basshylyq etýde jáne tálim berýde. Biz Oǵan qalaisha rizashylyq bildire almaimyz?! Qudai kieli, ádil, raqymdy, meiirimdi jáne súiispenshilikke toly. Ayan kitabynyń 4:11 ayatynda bylai aitylǵan: «Qudai Iemiz! Sen ulylyq, qurmet pen bilikke laiyqsyń. Óitkeni búkil álemdi jaratqan Ózińsiń; Seniń erkińmen ol jaratyldy jáne bola da beredi».
3. Qudaimen kúndelikti qarym-qatynasta bolýǵa ýaqyt bólińiz
Qudaimen ár kúni qarym-qatynasta bolǵanymyz óte mańyzdy. Keibir adamdar osyndai kezderdi «tynysh ýaqyt» dep ataidy. Basqalar bolsa «rýxani baǵyshtalý» deidi, óitkeni osy ýaqytta ózimizdi Qudaiǵa baǵyshtaimyz. Bireýler bul ýaqytty tańerteń, al keibireýler keshke ótkizgendi unatady. Alaida bul ýaqytty qalai ataýyńyz nemese qai mezgilde ótkizetindigińiz mańyzdy emes, eń mańyzdysy Qudaimen qarym-qatynasta bolatyn ýaqytyńyzdyń únemi turaqtylyǵy. «Tynysh ýaqyt» neden turady?
A) Minajat etý. Minajat etý – bul Qudaimen sóilesý ádisi. Oǵan ózińizdiń muqtajdyqtaryńyzdy aityńyz. Odan danalyq pen jeteleýdi, sondai-aq nege muqtajsyz, ony da surańyz! Ózińizdiń Oǵan degen súiispenshiligińizdi bildirip, Onyń siz úshin istep jatqandarynyń bárin baǵalaitynyńyz týraly aityńyz. Siynýdyń bar mán-maǵynasy osynda.
Á) Kieli kitapty oqý. Kieli kitapty qaýymda talqylap oqýdan tys, ony Ózińiz de oqýyńyz kerek. Másixshi retinde rýxani jaǵynan tabysty ómir súrýińizge barlyq qajetti málimet Kieli kitapta bar. Durys sheshim qabyldaý, Qudaidyń erkin tanyp bilý, basqalarǵa ýaǵyz aitý jáne rýxani ósý siyaqty salalarǵa arnalǵan Qudaidyń barlyq nusqaýlary bar. Kieli kitap – sizge aitylǵan Qudaidyń Sózi. Shyn máninde Kieli kitap - Qudaiǵa unamdy jáne ózińizdi qanaǵattandyratyndai ómir súrýińizge berilgen Qudaidyń nusqaýlary.
4. Rýxani ósýińizge kómegi tietin adamdarmen qarym-qatynasyńyzdy damytyńyz
Qorynttyqtarǵa arnalǵan 1-xattyń 15:33 ayatynda bylai jazylǵan: «Mundailarǵa aldanyp qalmańdar! «Arammen aralasqan jan adal ádetinen aiyrylady». Kieli kitap aram nietti adamdardyń yqpalynan aldyn ala saqtandyrady. «Arammen» aralasqan ýaqyttarymyz bizdiń azǵyrylýymyzǵa ákep soqtyrady. Aralasqan adamdarymyzdyń minez-qulqy mindetti túrde bizdiń júris-turysymyzǵa áserin tigizedi. Sondyqtan ainalamyzda Qudaidy súietin jáne Oǵan ómirlerin arnaǵan adamdar bolǵany mańyzdy.
Ózińizge kómek bere alatyn jáne qoldaityn dostar tabýǵa tyrysyńyz, olar óz qaýymyńyzdan bolýy da múmkin (Evrei. xat 3:13; 10:24). Osyndai dostar sizden «tynysh ýaqytyńyz» (yaǵni Qudaimen ońasha bolý ýaqytyńyz), kúndelikti turmysyńyz jáne Qudaimen bolatyn ómirlik «sayaxatyńyz» jaiynda esep alyp tursyn, olardan osy jaiynda kómek surańyz. Qajet bolsa ózińizdiń olar úshin de osylai istei alatynyńyzdy aityńyz. Bul aitqanymyz Isany óziniń Qutqarýshysy dep tanymaǵan barlyq dostaryńyzdy umytý kerek degendi bildirmeidi. Olarmen dostyǵyńyzdy jalǵastyryp, olardy da jaqsy qórińiz. Olarǵa Isanyń sizdiń ómirińizdi qalai ózgertkeni jaiynda aityńyz jáne ózińizdiń burynǵy daǵdyly jaman isterińizdi endi istemeitinińizdi xabarlańyz. Osyndai dostaryńyzǵa Isa týraly kýálik aitý úshin Qudaidan múmkindik surańyz.
5. Shomyldyrý rásiminen ótińiz
Kóptegen adamdar shomyldyrý rásiminiń maǵynasyn durys túsinbeidi. «Shomyldyrý» degen sózdiń maǵynasy sýǵa batyrylyp shyǵýdy bildiredi. Shomyldyrý rásimi – Isaǵa sengenińizdi jáne Onyń sońynan eretinińizdi adamdardyń aldynda jariyalaý bolyp tabylady. Shomyldyrý rásimi - Kieli kitap boiynsha isteletin ádis. Bizdiń sýǵa batyrylýymyz Másixpen birge jerlengenimizdi, al sýdan shyǵýymyz - Onymen ólimnen qaita tirilgenimizdi beineleidi. Biz shomyldyrý rásiminen ótý arqyly Isamen birge ólgenimizdi, Onymen birge jerlengenimizdi jáne ólimnen qaita tirilgendigimizdi bildiremiz (Rim. xat 6:3-4).
Shomyldyrý rásimi qutqarylý ákelmeidi. Shomyldyrý kúnáni jýyp shaya almaidy. Shomyldyrý rásiminen ótý arqyly siz Másixti ózińizdiń Qutqarýshyńyz dep qabyldaǵanyńyzdy jariyalap, Qudaiǵa moiynsunýyńyzdyń birinshi qadamyn jasaisyz. Shomyldyrý rásiminen ótýge daiyn bolǵan kezde bul jaiynda qaýym qyzmetshisimen sóilesińiz.
English
Men Isaǵa sendim... endi ne isteýim kerek?