Suraq
Máńgilik qaýipsizdik jaily oi Qudaidyń sózine sai keledi me?
Jaýap
Adam Másixti óziniń Qutqarýshysy retinde tanyp bilip qabyldasa, Qudaimen dostasyp, máńgilik qaýipsizdikke qol jetkizedi. Yahýdanyń xatynyń 24 ayatynda: «Senderdi adasyp ketýden saqtap, Óziniń nurly saltanaty kóringen kúni qýanyshpen, múltiksiz taza kúilerińde óz aldyna turǵyzýǵa birden-bir Qudaiymyzdyń qudireti jetedi» - dep aitylǵan. Demek senýshini súrinýden saqtaýǵa Qudaidyń qudireti jetkilikti. Onyń saltanatty ulylyǵyn kórýimiz nemese kórmeýimiz bizdiń qolymyzda emes, Onyń qudiretti qolynda. Bizdiń máńgilik qaýipsizdigimiz Qudaidyń bizdi saqtaǵanyna bailanysty, demek qutqarylýymyzdy saqtaý da bizdiń qolymyzdaǵy is emes.
Iemiz Isa Másix bylai jariyalaǵan: «Solarǵa máńgilik ómir beremin. Olar eshqashan qurymaidy, eshkim olardy Meniń qolymnan tartyp almaidy. Olardy Maǵan bergen Ákem bárinen de uly. Eshkim solardy Ákemniń qolynan tartyp ala almaidy» (Joxan 10:28-29). Isa da, Qudai Áke de bizdi Óz qoldarynda myqtap ustap tur. Osy Ekeýiniń qudiretti qoldarynan bizdi kim tartyp ala alady?
Efes. xat 4:30 ayatynda: «Onymen (Kieli Rýxpen) «tańbalandyńdar»: ómirlerińnen oryn alǵan Ol – bir kúni jamandyq ataýlydan azat etilýlerińniń kepili» - dep aitylǵan. Demek Kieli Rýxpen «tańbalanǵan» senýshiler bir kúni ólimnen aza etiledi. Bizde máńgilik qaýipsizdik joq bolǵanda biz ólimnen azat bolý úshin emes, kúnálarymyz ben senimsizdigimiz úshin jazalaný úshin «tańbalanǵan» bolar edik. Joxan 3:15-16 ayattarynda Isaǵa «senýshi árkim máńgilik ómirge ie bolady» dep aitylǵan. Eger adamǵa ýáde etilgen máńgilik ómir odan keiin tartyp alynsa, onda ol máńgilik ómir bolmas edi. Ondai jaǵdaida Kieli kitaptaǵy barlyq ýádeler qate bolyp shyǵatyn edi.
Máńgilik qaýipsizdik jaily eń myqty paiymdaý Rim. xat 8:38-39 ayattarynda keltirilgen: «Men mynaǵan nyq senemin: ólim de, ómir de, perishteler de, jyn-periler de, búgingi kún de, bolashaq ta, tabiǵattan tys kúshter de, ne ústimizdegi, ne astymyzdaǵy eshqandai kúsh te, tipti jaratylystyń basqa eshbir nársesi de bizdi Qudaidyń Isa Másix arqyly kórsetip júrgen súiispenshiliginen aiyra almaidy!» Bizdiń máńgilik qaýipsizdigimizdiń negizi - Qudaidyń súiispenshiligi, óitkeni Ol súigenderin qutqaryp alǵan. Yaǵni bizdiń máńgilik qaýipsizdigimiz Isanyń qanymen, Ákeniń ýádesimen jáne Kieli Rýxtyń tańbasymen bekitilgen.
English
Máńgilik qaýipsizdik jaily oi Qudaidyń sózine sai keledi me?